Мужчына прыйшоў у міліцыю забраць свой бел-чырвона-белы сцяг — і яго пасадзілі на трое сутак
Раман Рашэцкі жыве ў Брэсце. У гэтыя выбары ён запісваўся ў незалежныя назіральнікі. А пасля, як і многія, стаў хадзіць на мірныя пратэсты.
За марш на дзень нараджэння Лукашэнкі, на які Раман выйшаў з белымі тапачкамі, мужчына атрымаў 15 сутак.
«Мы на плошчы Леніна пасядзелі, патанчылі. І ўжо калі пасля мітынгу я ішоў дадому са сцягам, мяне затрымалі. Скруцілі, кінулі ў машыну. Паклалі тварам у падлогу. Думаў, будуць біць, але не чапалі. Сядзеў у ізалятары Ленінскага РАУС, а на апошнія чацвёра сутак нас перавезлі ў Бярозу: відаць, вызвалялі месца ў Брэсце пад хапун», — расказвае Раман.
Сцяг занеслі ў вопіс канфіскаваных рэчаў. Сказалі, што пасля вызвалення можна будзе забраць.
17 верасня мужчына пайшоў па яго ў міліцыю.
«Мне адказалі: сцяг аддалі вашым суайчыннікам. І нічога канкрэтнага. Прыгразілі: калі будзеце прыходзіць па сцяг, гэта будзе расцэнена як надакучлівае прыставанне да супрацоўнікаў міліцыі. Я рассмяяўся тады з гэтай фармулёўкі», — успамінае Раман.
У той жа дзень ён напісаў скаргу і аднёс яе ў дзяжурную частку. Тэлефанаваў пасля, каб даведацца выходны нумар дакумента, але трубку ніхто не ўзяў. Тады 18 верасня мужчына зноў пайшоў у міліцыю.
«Вяду сябе адэкватна, ніякіх лішніх словаў. Стукаюся ў брамку, кажу, што мне трэба даведацца нумар скаргі. Паставы такі: добра, пачакайце. Праз час выходзіць іншы ўчастковы і запрашае зайсці у РАУС.
Рэчы мае кладзе ў ячэйку, заводзіць у пакой допыту і пачынае складаць пратакол затрымання — па ч. 1 арт. 17, хуліганка.
У фабуле пратакола так і напісалі: надакучліва прыставаў да супрацоўніка міліцыі. Мяне закрылі на 72 гадзіны.
У панядзелак, 21 верасня, быў суд. У справе напісалі, што я барабаніў у брамку, на заўвагі не рэагаваў, перашкаджаў працы паставога. Кажу: запрасіце на суд таго супрацоўніка, хто на мяне скардзіўся, і пакажыце відэа з камер назірання над варотамі РАУС. Міліцыі далі дзве гадзіны, каб гэта зрабіць, — нічога не адбылося. У выніку справу адправілі на дапрацоўку, і мяне адпусцілі», — апісвае той працэс Раман.
Сцяг ён па-ранейшаму збіраецца вярнуць.
«Я яго купляў афіцыйна ў краме «Князь Вітаўт», плаціў 35 рублёў. Гэта мая маёмасць», — тлумачыць мужчына.
Цяпер чытаюць
Вайб-праграмаванне зменіць ролю распрацоўшчыка, RLVR, і калі лопне бурбалка. Беларус-інжынер у галіне ШІ, які працуе ў ЗША, расказаў, што нас чакае ў 202633
Каментары