Advakata Babaryki i Kaleśnikavaj mohuć pazbavić licenzii z-za jaho kamientara Tut.by
7 kastryčnika Alaksandru Pylčanku — abaroncu Viktara Babaryka i Maryi Kaleśnikavaj — u Ministerstvie justycyi ŭručyli «apaviaščeńnie ab razhladzie pytańnia ab spynieńni dziejańnia licenzii», piša Tut.by.
— Ja aznajomiŭsia z materyjałami, jakija buduć pradmietam razhladu na kamisii — heta publikacyja Tut.by ad 14 žniŭnia, dzie ja kazaŭ pra svajo bačańnie situacyi, ab pravavoj acency taho, što adbyvajecca ŭ krainie. 9-12 žniŭnia my nazirali niejkija nievierahodnyja rečy, ludzi prosta nie vieryli, što heta biełaruski AMAP źbivaje ludziej — chacieli vieryć, što heta rasijski, nichto nie razumieŭ, čamu nichto z nahladnych orhanaŭ nie pradprymaje nijakich dziejańniaŭ, nie zavodzić kryminalnyja spravy pa dziejańniach supracoŭnikaŭ MUS, usie byli ŭ šoku. U kamientary Tut.by ja raspavioŭ, što moža rabić Hienprakuratura, kali ŭ krainie adbyvajucca niejmaviernyja rečy. Paźniej na dziaržaŭnym kanale havaryłasia, što ja ledź nie ekstremisckija vykazvańni rablu i što maim słovam budzie dadzienaja pravavaja acenka, — kaža Pylčanka.
U publikacyi 14 žniŭnia Alaksandr Pylčanka raspavioŭ, jakimi paŭnamoctvami vałodaje hienprakuror i jakija dziejańni moža raspačać pa apublikavanych u ŚMI videa i śviedčańniach źbićcia ludziej 9-12 žniŭnia ŭ RUUS i IČU. Juryst zajaviŭ, što hienprakuror Biełarusi pavinien raspačać kryminalnyja spravy pa faktach źbićcia mirnych hramadzian, žorstkaha i biesčałaviečnaha abychodžańnia z zatrymanymi. Juryst taksama adznačyŭ, što Hienprakuratura pavinna adchilić ad zajmanych pasad na čas pravierki ministra ŭnutranych spraŭ, jaho namieśnikaŭ i načalnika IČU da ŭstanaŭleńnia ich dačynieńnia abo niedatyčnaści da taho, što adbyłosia.
Kamientary