SAAZ paviedamiła ab rekordnym roście zaražeńnia karanavirusam za tydzień
Kolkaść infikavanych karanavirusam vyrasła ŭ śviecie za minuły tydzień bolš čym na 2,2 młn, heta samy vysoki rost za siem dzion ad pačatku pandemii. Kolkaść vypadkaŭ sa śmiarotnym zychodam pavialičyłasia bolš jak na 39 tys., što prykładna adpaviadaje pakaźnikam papiaredniaha tydnia. Pra heta paviedamiła Suśvietnaja Arhanizacyja Achovy zdaroŭja (SAAZ), piša TASS.
Kolkaść aficyjna paćvierdžanych vypadkaŭ zaražeńnia karanavirusam pa stanie na 11 kastryčnika dasiahnuła 37 109 851, a kolkaść śmiarotnych zychodaŭ — 1 070 355.
Samaja ciažkaja epidemičnaja situacyja nazirajecca ŭ Paŭnočnaj i Paŭdniovaj Amierycy. Usiaho ŭ hetym rehijonie z 5 pa 11 kastryčnika zarazilisia bolš za 804 tys. čałaviek, a ahulnaja kolkaść infikavanych pieravysiła 17,79 młn. Za siem dzion zarehistravanyja bolš za 20 tys. śmierciaŭ, i na 11 kastryčnika ahulnaja kolkaść śmiarotnych zychodaŭ skłała bolš za 588 tys.
U rehijonie Paŭdniova-Uschodniaj Azii za tydzień zarazilisia bolš za 575 tys. čałaviek, i ich ahulnaja kolkaść pieravysiła 7,9 młn. Kolkaść pamierłych pieravysiła 126 tys., što na 7,75 tys. bolš, čym tydniem raniej.
U Jeŭropie zafiksavany samy vialiki rost zachvorvańnia ŭ paraŭnańni z papiarednimi siamju dniami (34%). Kolkaść tych, chto zaraziŭsia, vyrasła bolš čym na 694 tys. — da amal 6,92 młn. za tydzień pamierli bolš za 6,1 tys. čałaviek, a ahulnaja kolkaść pamierłych pieravysiła 246 tys.
U Indyi kolkaść infikavanych pavialičyłasia za siem dzion bolš čym na 504 tys., u ZŠA — bolš čym na 327 tys., u Brazilii - bolš čym na 175 tys. U Jeŭropie bolš za ŭsio zachvarełych za minuły tydzień vyjaŭlena ŭ Vialikabrytanii (bolš za 110 tys.). Na druhoj pazicyi — Francyja (bolš za 110 tys.), na treciaj — Rasija (bolš za 83,5 tys.), na čaćviortaj — Ispanija (bolš za 50 tys.), na piataj — Niderłandy (bolš za 36 tys.).
Pa kolkaści pamierłych za tydzień sumnaje pieršynstvo ŭ śviecie ŭ Indyi — bolš za 6,5 tys. čałaviek. Dalej iduć Mieksika (bolš za 5 tys.), ZŠA (bolš za 4,8 tys.) I Brazilija (bolš za 4,2 tys.).
Kamientary