Taksist jechaŭ na sustreču z žonkaj i dziciom — adpravili na Akreścina, a aŭto apiačatali na 8 miesiacaŭ
U paniadziełak minski taksist Vadzim Zapolski jechaŭ z pracy. Ale dadomu tak i nie dabraŭsia. AMAP pierakryŭ busikam praśpiekt Niezaležnaści kala stancyi mietro «Uschod» i staŭ spyniać kiroŭcaŭ.
«Ja damoviłasia ź im sustrecca kala doma, kab pieradać hadavałaje dzicia i pajechać u palikliniku da doktara. Pa darozie atrymała sms ad muža, što jaho zatrymali. A paśla ŭbačyła paviedamleńnie ŭ telehramie, što mašynu «Jandeks» taksama zabrali», — raskazvaje žonka Alina.
Paśla stała viadoma, što na tym miescy z mašyn zabrali nie tolki Vadzima, ale i jašče dvuch kiroŭcaŭ.
U paniadziełak Alina bolš nijakich navin pra muža nie čuła. Dadomu Vadzim viarnuŭsia tolki paśla abiedu ŭ aŭtorak — noč jon pravioŭ u IČU na Akreścina. Što było ŭ hety pramiežak času, žonka pierakazvaje ź jaho słoŭ:
«Muž jechaŭ z chutkaściu 40 km/h, jaho spynili. Spačatku dali pratakoł ab pavolnym ruchu, vypisali štraf 0,5 bazavych. Paśla pryjšoŭ druhi apierupaŭnavažany, jakomu pastupiŭ rapart ad supracoŭnika DAI, što mašyna z «padazronym» VIN-kodam.
Dastavili ŭ Pieršamajskaje RUUS. Trymali ŭ spartyŭnaj zale z usimi zatrymanymi, paśla apisali telefon. Adpravili na Akreścina, šeść čałaviek u kamieru na piać miescaŭ».
Z pratakołami Vadzim aznajomiŭsia tolki ŭ sudzie. Jaho vinavacili pa dvuch artykułach — 23.34 (udzieł u niesankcyjanavanym masavym mierapryjemstvie) i 23.4 (niepadparadkavańnie milicyi). Pa pieršym dali štraf 20 bazavych (540 rubloŭ), druhi adpravili na dapracoŭku.
Mašynu apiačatali na 8 miesiacaŭ. Sa słoŭ siamji, aŭto, kuplenaje letaś u sałonie, pieradali ŭ kryminalny vyšuk, kab nibyta pravieryć VIN-kod.
«Heta adzinaja krynica dachodu dla našaj siamji z hadavałym dziciem, — biantežycca Alina. — Ja prasiła ŭ RUUS viarnuć aŭto, jano patrebna dla pierasoŭvańnia ź dziciem pa horadzie, małomu nieabchodna dyjahnostyka, ale tam adkazali, što dapamahčy ničym nie mohuć».
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary