Biełaruskija mastaki źjechali ŭ Bierlin paśla vybaraŭ. Spadziavalisia pažyć biaspłatna — rezidencyja skazała adpracoŭvać
Dvoje biełaruskich mastakoŭ paśla vybaraŭ źjechali ŭ Hiermaniju. U tvorčaj rezidencyi ŭ Bierlinie, dzie ich pahadzilisia biaspłatna pryniać, jany spadziavalisia adpačyć. Ale akazałasia, što prapanovu treba adpracoŭvać.
Pra heta raskazaŭ mastak Alaksiej Kuźmič. Jon ciapier taksama žyvie ŭ Bierlinie.
«Ja znachodžusia ŭ inšaj rezidencyi, dzie adroźnivajucca ŭmovy. Mnie płaciać hrošy, kab ja prosta raźvivaŭsia jak mastak i ničoha nie patrabujuć, prosta dakumientujuć praces. Mnie dali kvateru, płaciać stypiendyju, časam my sustrakajemsia z prymajučym bokam, razam chodzim na viečaryny».
Jaho znajomyja mastaki (svaje imiony jany nie chočuć razhałašać — «NN») pryjechali ŭ inšuju rezidencyju — pad kryłom paśpiachovaj art-hrupy. Chłopcy dumali, što im dapamohuć u hety składany čas pabyć u biaśpiecy, pryvieści dumki ŭ paradak. A pa fakcie jany pryjechali na pracu.
«Ich ekspłuatujuć piać dzion u tydzień, z ranku da viečara. Ja, naprykład, zajmajusia svaimi spravami, pišu knihu pra akcyjanizm. A hetyja chłopcy pracujuć nie pad svaje patreby, a pad čužy prajekt», — kaža Alaksiej.
Mastakam apłacili pierajezd i pražyvańnie ŭ Bierlinie, vydajuć 1000 jeŭra na miesiac. Pa słovach Kuźmiča, hrošy na heta vydzialajucca z admysłovych fondaŭ. Ale chłopcy pa naiŭnaści padpisali kantrakt i ciapier musiać pracavać pa poŭnaj. Prytym što bierlinskija rascenki zusim inšyja — dyzajnier-mastak z adukacyjaj zvyčajna atrymlivaje 2500-3000 jeŭra.
Sama takaja praktyka — kali art-hrupy najmajuć pracoŭnyja ruki — zvyčajnaja źjava.
«Suśvietna viadomyja mastaki, jak Endzi Uorchał ci Džef Kuns, naprykład, majuć takija fabryki. Pa 200-400 čałaviek časam na ich pracujuć — malujuć, robiać dyzajn na kampjutary, klejać. A potym słavutyja mastaki staviać svoj podpis na hetym tvory i pradajuć kalekcyjanieram na aŭkcyjonach, — tłumačyć Kuźmič. —
Toje, što robicca pad markaj salidarnaści ź biełarusami, — nasamreč ekspłuatacyja pracoŭnaj siły.
Ale bolš ździŭlaje hipierbalizavany kanfarmizm, zhoda, strach biełarusaŭ. Jany dumajuć: a moža, tak i treba? Mastaki nie pasprabavali niejak źviazacca z prymajučaj arhanizacyjaj. Nie zadajuć pytańniaŭ, prosta pahadzilisia sa svajoj ekspłuatacyjaj».
Kamientary