U Varšavie na publičnym mierapryjemstvie pabilisia biełaruskija emihranty. Praz što byŭ kanflikt? VIDEA

U žyćci biełarusaŭ Varšavy razhareŭsia kanflikt — dźvie hrupy nie padzialili miž saboj placoŭku, kab pravieści mierapryjemstva. U vyniku ŭsio skončyłasia bojkaj, kryvioj i zajavaj u palicyju.

Pavialičyć

Udzielnikami kanfliktu vystupili były maładafrontaviec, były palitviazień Pilip Šaŭroŭ i kiraŭnik fundacyi «Zachad — Uschod» Alaksandr Małaščuk. Zdymki z kryvioj, a taksama videa bojki ablacieli sacyjalnyja sietki i miesiendžary. Što ž nie padzialili biełarusy?

Pilip Šaŭroŭ byŭ dastatkova zaŭvažnym u Biełarusi čałaviekam. U pačatku minułaha hoda jon prasłaviŭsia pierformansam, kali razmalavaŭ ruki pomniku Puškinu ŭ čyrvony koler. Šaŭroŭ sam zdaŭsia ŭ milicyju. Za kratami jon prabyŭ čatyry miesiacy, u vyniku atrymaŭ dosyć miakki prysud — 50 bazavych vieličyń štrafu. Padčas padziej leta — pačatku vosieni Šaŭroŭ dapamahaŭ vałancioram na Akreścina.

Hladzi jašče: Pra pasiečanaha Lenina, pafarbavanaha Puškina i skandalnyja vykazvańni ŭ SIZA — vialikaja hutarka ź Pilipam Šaŭrovym

Alaksandr Małaščuk rodam z Bresta, u Varšavu pierabraŭsia piać hadoŭ tamu. Kaža, što palitykaj nikoli nie zajmaŭsia i pierajezd nie maje nijakich palityčnych pryčyn. U kastryčniku 2020 hoda zarehistravaŭ fond «Zachad — Uschod». «My i raniej zajmalisia kulturnaj dziejnaściu, arhanizacyjaj fiestyvalaŭ. Ciapier prosta vyrašyli strukturyzavacca. Zaraz vialiki vał biežancaŭ, kali jon skončycca, to znoŭ zasiarodzimsia na dziejnaści, dzie niama palityki», — raskazvaje Małaščuk.

Pilip Šaŭroŭ havoryć, što jon ź siabrami i paplečnikami štoniadzielu pravodzić akcyi salidarnaści la varšaŭskaha Pałaca kultury i navuki — heta vysoki budynak niedaloka ad čyhunačnaha vakzała. Adnak 10 studzienia na tym samym miescy było zapłanavanaje jašče adno mierapryjemstva — biełaruski ładzili tancavalny čelendž «Ijerusalim». Atrymlivajecca, što nie padzialili placoŭku.

Šaŭroŭ nastojvaŭ, što jaho mierapryjemstva ŭzhodnienaje, i prasiŭ tych, chto sabraŭsia tancavać, pierajści na inšy bok darohi. U adzin z momantaŭ zaviazałasia bojka. Pilip spačatku ściahnuŭ šapku z Małaščuka, a potym nanios niekalki ŭdaraŭ pa hałavie, pakul jaho nie spynili.

«Pra hety fond nichto nie viedaje, jon stvorany dla raśpiłu hrošaj, — emacyjna kaža Pilip. — Małaščuk pryjšoŭ na sustreču pjanym, jon zaŭsiody takim chodzić. Hety čałaviek — strašny seksist, kali była anłajn-sustreča dyjaspary, vy b čuli, jak jon zatykaŭ dziaŭčat».

Sam Małaščuk admaŭlaje toje, što byŭ pjanym. «Ja prajšoŭ abśledavańnie ŭ špitali — kali b ja byŭ pjany, to heta było b zafiksavana ŭ daviedcy, adnak ničoha takoha niama. U daviedcy napisana «raśsiačeńnie hałavy», mnie nakłali švo daŭžynioj 4 santymietry. Ja navat nie zrazumieŭ, praz što pačałasia bojka», — kaža Małaščuk.

U vyniku była padadzienaja zajava ŭ palicyju, ciapier Małaščuk płanuje źviarnucca jašče ŭ sud. Pilip miarkuje, što ŭ vyniku jamu moža pahražać štraf, a taksama departacyja z Polščy. Tym nie mienš, prasić prabačeńnia ŭ Małaščuka jon nie płanuje, ličyć, što racyja na jahonym baku.

• 0
• 0
• 2
• 8
• 1
• 0
• 3
• 0