Ułady paabiacali IIHF pakazać vyniki pravierki pa śmierci Bandarenki. Rodnyja: «Fiejeryčnaja kryvadušnaść»
Uviečary 13 studzienia ŭrad apublikavaŭ zajavu z nahody płanaŭ pravieści ŭ Minsku čempijanat śvietu pa chakiei — 2021. Ułady paabiacali, što arhanizujuć usio na naležnym uzroŭni. A što tyčycca padazreńniaŭ u adras kiraŭnika biełaruskaj chakiejnaj fiederacyi Dźmitryja Baskava — to spartyŭnym bosam paabiacali pradastavić vyniki pravierki Hienprakuratury ab śmierci Ramana Bandarenki. Siamja chłopca aburanaja: im samim, navat rodnaj maci, da hetaha času admaŭlajuć u dostupie da materyjałaŭ, piša Tut.by.
Navina vyklikała šok u siamji Ramana Bandarenki: z 13 listapada jany damahajucca taho, kab była zaviedzienaja kryminalnaja sprava z-za śmierci chłopca. Ale Hienprakuratura viadzie tolki daśledčuju pravierku.
U maci niama statusu paciarpiełaj, i tamu žančyna nie moža navat aznajomicca z materyjałami pravierki — u adroźnieńnie ad spartyŭnych čynoŭnikaŭ, jakim ciapier dadziena takoje abiacańnie.
Na hety momant rodnyja nie viedajuć, ci jość padazravanyja ŭ śmierci Ramana; urešcie, ci zavieršana sudova-miedycynskaja ekśpiertyza — i jakija jaje vyniki, u tym liku aficyjnaja pryčyna śmierci.
«Ličym hetuju zajavu fiejeryčnaj kryvadušnaściu, — zajaviła advakat Iniesa Alenskaja, jakaja pradstaŭlaje intaresy siamji Bandarenki. — Maci Ramana Bandarenki na praciahu ŭsich dvuch miesiacaŭ pravierki nieadnarazova atrymlivaje admovy Hienprakuratury na prośby dać lubuju infarmacyju ab chodzie pravierki (pryčym usie listy z adkazami iduć pad adnym i tym ža vychodnym numary, 1800 — 38-2020). U suviazi z hetym nakiroŭvajem adkrytuju i publičnuju prośbu (chadajnictva) da pradstaŭnikoŭ Dyscyplinarnaha Kamiteta MFCH: zaprasić Alenu Bandarenku i advakata na aznajamleńnie z materyjałami pravierki. Bo dla Aleny vykarystańnie takoha «žestu dobraj voli» źjaŭlajecca adzinym šancam daviedacca, z-za čaho zahinuŭ jaje adziny syn».
Pradstaŭnik siamji dadała: 21 śniežnia siamja atrymała čarhovuju admovu Hienprakuratury na prośby dać infarmacyju ab chodzie razboru. Tam adkazali, što pravierka ŭsio jašče idzie, maci i advakat nie źjaŭlajucca ŭdzielnikami pracesu, a tamu tyja «nie majuć prava atrymlivać u chodzie vytvorčaści pa materyjałach pravierki atrymanuju infarmacyju i inšyja źviestki».
Bolš taho, Alenu Bandarenka navat nie apaviaścili ab padaŭžeńni terminaŭ pravierki, udakładniła advakatka.
Ciapier čytajuć
Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak2020
Kamientary