Bjem u bubien — i kryzis adstupaje

Daŭno ŭžo narod u formie čutak pra devalvacyju nie vydavaŭ na hara stolki falkłoru.

Prafiesija? — spytaŭ čałaviek za stojkaj haścinicy.

— Etnahrafičnaja ekśpiedycyja, — adkazaŭ klijent.

Parćje ŭźniaŭ na hościa vočy.

— A, jasna. Palčyki katać budziecie? Usio terarysta šukajecie?

— Nie, vy nie zrazumieli. Źbiraju dyjamienty narodnaj tvorčaści. Nu, tam, tosty, kazki, abrady, čutki… Mif pra sajuznuju valutu, naprykład. Havorać u vas pra takoje staryja ludzi?

— Čutki? Darahi, tabie vyklučna pašancavała! Jość u mianie adna supierčutka…

Jon advioŭ etnohrafa ŭ padsobku i zašaptaŭ tamu ŭ dyktafon:

— Słuchaj pra devalvacyju. Čystaja praŭda! Kažuć, što valuty ŭ schoviščach Nacbanku na dva tydni. Chutka usio laśniecca! Praz tydzień kurs budzie 3500! Ujaŭlaješ? Tak što biažy chutčej baksy nabyvać. Treba ŭsim rabić rytualny abmien.

Małady čałaviek až zapłakaŭ:

— Zajčyka škada.

— Mnie dakłali, što vy etnohraf, — rezkim rucham adčyniŭšy dźviery, uvajšoŭ čałaviek u darahim kaściumie.

Student radasna zakivaŭ hałavoju:

— Tak! I ja maru zapisać jaki‑niebudź redki narodny abrad, a ŭziać udzieł u im było b prosta fantastyčna!

— Darahi, tabie vyklučna pašancavała. Jak nakont taho, kab uziać udzieł u abradzie «Vybivańnie kredytu ŭ Rasii»?

— Vaŭ! A ŭ čym jaho sutnaść?

— Heta daŭni pryhožy abrad. Spačatku my pravodzim pasiadžeńnie pa biahučych prablemach sacyjalna‑ekanamičnaha raźvićcia. Nas — supracoŭnikaŭ uradu — buduć piasočyć. My na heta majem kivać hałovami i niešta zapisvać. Jość pavierje, što padobnyja pasiadžeńni vyvodziać krainu z kryzisu. Paśla my bjem u bubien na našych telekanałach, pramaŭlajem słovy zaklinańniaŭ pierad rasijskimi žurnalistami, i ŭrešcie nam dajuć kredyt, a kryzis adstupaje, pieramožany našymi čarami.

Student byŭ u zachapleńni. U hetym kutku Jeŭropy zachavalisia takija cikavyja narodnyja tradycyi! Jaho praca budzie praryvam u etnahrafii.

— A ŭ čym maja funkcyja? — spytaŭ jon.

Čynoŭnik trochi pamaŭčaŭ.

— Čym bolš Hałoŭny Šaman budzie nas piasočyć, tym macniejšaja efiektyŭnaść rytuału. Tamu treba napiaredadni vyklikać u jaho žudasnuju jaraść. Publična skazać, što biełaruskaj haspadarcy kapcy, što defołt niepaźbiežny…

— A, ja čuŭ pra heta! Maja rytualnaja rola nazyvajecca «Kudryn»!

— Tak. Adnak vy musicie być hatovym da taho, što Hałoŭny Šaman budzie vas krytykavać, na słovach cierci ŭ parašok, nazyvać brudnymi słovami.

Student pabieh rychtavacca da vystupu.

Čynoŭnik na ŭsiaki vypadak prašaptaŭ zamovy ad dziaržkantrolu i dziaržbiaśpieki i skiravaŭsia da svajho limuzinu. Zamovu ad aŭtainśpiekcyi nie pramaŭlaŭ — u jaho byŭ achoŭny amulet, prymacavany na łabavym škle. Zamovy ad Hałoŭnaha Šamana, na žal, nie isnavała.

Lolik Uškin

• 0
• 0
• 0
• 0
• 0
• 0
• 0
• 0