Siarhiej Sidorski siońnia pravioŭ pieramovy z prezidentam Ukrainy Viktaram Juščankam i premjer-ministram Julijaj Cimašenka.
"My zdymajem usie ŭzajemnyja antydempinhavyja rasśledavańni i ŭsie abmiežavańni i pierachodzim da kanstruktyŭnaj pracy", — zajaviła premjer-ministr Ukrainy Julija Cimašenka pa vynikach pieramoŭ sa svaim biełaruskim kaleham Siarhiejem Sidorskim u Kijevie 12 červienia.
Jak paviedamlaje pres-słužba Savieta ministraŭ Biełarusi, u Kijevie padpisany miemarandum ab ŭzajemarazumieńni pamiž Ministerstvam zamiežnych spraŭ Biełarusi i Ministerstvam ekanomiki Ukrainy ŭ śfiery prymianieńnia śpiecyjalnych (abaronnych) antydempinhavych i kampiensacyjnych mier va ŭzajemnym handli.
Premjery taksama padpisali mižuradavaje pahadnieńnie ab biaźvizavym režymie, u miežach jakoha budzie sproščana pracedura rehistracyi hramadzian pry ŭzajemnych pajezdkach.
Dakumient praduhledžvaje, što dziejny trochdzionny termin znachodžańnia hramadzian Ukrainy na terytoryi Biełarusi bieź nieabchodnaści rehistracyi budzie pavialičany da 30 dzion.
Padpisańnie novaha pahadnieńnia "vyklikana nieabchodnaściu dakładnaha narmatyŭna-pravavoha ŭrehulavańnia režymu ŭzajemnych pajezdak hramadzian dźviuch krain i zaklikana ŭparadkavać praces rehistracyi na terytoryi dźviuch dziaržaŭ", adznačaje pres-słužba. Dakumient składzieny na nieabmiežavany termin i pačynaje dziejničać na 30-y dzień z času pryniaćcia dypłamatyčnymi kanałami apošniaha piśmovaha paviedamleńnia ab vykanańni ŭsich unutrydziaržaŭnych pracedur.
Pavodle vynikaŭ pieramoŭ u Kijevie padpisana taksama pahadnieńnie ab supracoŭnictvie Biełarusi i Ukrainy ŭ halinie daśledavańnia i vykarystańnia kaśmičnaj prastory ź mirnymi metami.
Premjery damovilisia ab adnaŭleńni pastavak ukrainskaj elektraenierhii ŭ Biełaruś. Kantrakt na pastaŭku ŭkrainskaj elektraenierhii ŭ Biełaruś pačynaje dziejničać siońnia, 12 červienia, paviedamiŭ Sidorski."Heta jašče adzin sposab plonnaha raźvićcia biełaruska-ŭkrainskich adnosin", — padkreśliŭ jon.
Cimašenka paćvierdziła, što realizacyja pastavak elektraenierhii ŭ Biełaruś pačniecca z času viartańnia biełaruskaj uradavaj delehacyi na radzimu. "My vielmi zacikaŭlenyja, kab pastaŭki ŭkrainskaj elektraenierhii na terytoryju Biełarusi byli raspačatyja. I siońnia chaču dać daručeńnie našamu ministru paliva i enierhietyki, kab toj kantrakt, jaki padpisany na pastaŭku elektraenierhii, byŭ adrazu puščany ŭ dziejańnie, i kab my pačali pastaŭku adrazu ž paśla vašaha (biełaruskaj delehacyi) viartańnia ŭ Biełaruś", — zajaviła premjer-ministr.
Jana taksama adznačyła, što Ukraina i Biełaruś mohuć aktyŭna supracoŭničać u pytańniach pastaŭki ŭkrainskaj elektraenierhii ŭ inšyja krainy. "My mahli b šmat zrabić pry sumiesnym eksparcie elektraenierhii ŭ inšyja krainy", — skazała Cimašenka.
Kantrakt na pastaŭku ŭkrainskaj elektraenierhii byŭ padpisany ŭ mai 2009 hoda. Biełaruś hatova impartavać u 2009 hodzie 750 młn. kVt.č ukrainskaj elektraenierhii pa ŭzajemavyhadnych dla bakoŭ cenach, nahadvaje pres-słužba.
Akramia taho, na siońniašnich pieramovach abmiarkoŭvałasia mahčymaść supracoŭnictva ŭ sistemie naftapierapracoŭki."Ukraina moža być transpartnaj krainaj, jakaja pastavić nieabchodnyja abjomy nafty dla Biełarusi, — ličyć Julija Cimašenka. — I ŭvohule, nam treba padumać, jak hetyja tranzitnyja linii pa pastaŭkach nafty ŭ Biełaruś možna aptymizavać, kab vyrablać dadatkovyja abjomy naftapraduktaŭ jak dla Biełarusi, tak i dla Ukrainy".
Pavodle vynikaŭ pieramoŭ premjery taksama zajavili ab najchutčejšym zaviaršeńni ŭsich pracedur pa demarkacyi biełaruska-ŭkrainskaj miažy,paviedamlaje pres-słužba.
***
Jak paviedamlaje pres‑słužba ŭkrainskaha prezidenta, «Juščanka stanoŭča acaniŭ toj fakt, što damoŭlenaści pamiž im i jaho biełaruskim kaleham Alaksandram Łukašenkam ab aktyvizacyi supracoŭnictva dźviuch krain u cełym realizujucca».
«Ja zadavoleny tym, što ŭ nas jość dobry kanśpiekt supracoŭnictva, pačynajučy ad dvuchbakovych, rehijanalnych, jeŭrapiejskich uzajemaadnosinaŭ. Ja ŭsialak budu padachvočvać i ŭrad, i palityčnyja siły, i parłamient Ukrainy razam supracoŭničać u hetym kantekście. Heta dla nas nadzvyčaj važnyja adnosiny», — skazaŭ Juščanka.
Jon vykazaŭ nadzieju, što padčas ciapierašniaha vizitu va Ukrainu biełaruskaha premjer‑ministra budzie prapracavany šerah stratehičnych pytańniaŭ, jakija praciahły čas nie ŭdavałasia vyrašyć. «Spadziajusia, vaš vizit daść mahčymaść usie hetyja pytańni ŭrehulavać», — skazaŭ Juščanka.
U svaju čarhu, Sidorski zaznačyŭ, što ŭsie damoŭlenaści, dasiahnutyja padčas minułaj sustrečy Juščanki i Łukašenki, uziaty ŭ Biełarusi pad «samy surjozny kantrol» i budzie rabicca ŭsio, kab jany vykonvalisia ŭ poŭnym abjomie.
«My pastajanna nadajem uvahu raźvićciu našych handlova‑ekanamičnych adnosinaŭ. Dumaju, u nas jość usie mahčymaści, kab naroščvać naš tavaraabarot», — skazaŭ Sidorski. Pry hetym jon zaznačyŭ, što letaś tavaraabarot Biełarusi i Ukrainy skłaŭ 5 młrd. dalaraŭ.
Ciapier čytajuć
Minharvykankam pra vuličnaje aśviatleńnie: Heta była razavaja akcyja. Siońnia ŭklučać a 18-j15
Kamientary