Bieła-čyrvonuju tabličku z nazvaj vulicy na domie paličyli pikietam, za jaje ŭ Ivanavie buduć sudzić haspadara
26 sakavika pryblizna a 18:30 da žychara horada Ivanava Andreja Dražyna ŭ dvor uvajšli šeść čałaviek: čaćviora siłavikoŭ u formie i dvoje ŭ cyvilnym, jakich nazvali paniatymi. Pryčynaj vizitu, jak śćviardžali milicyjanty, była «ananimka»: sprava ŭ tym, što na pryvatnym domie Andreja Dražyna visić bieła-čyrvonaja šylda z nazvaj vulicy i numara doma. Hety pakazalnik haspadar doma paviesiŭ jašče ŭ 2015 hodzie.
Andrej Dražyn nie pahadziŭsia pravodzić ahlad z paniatymi, jakich pryviała milicyja, a paklikaŭ dvaich susiedziaŭ. Ź imi supracoŭniki milicyi i ahledzieli dom, chleŭ, haraž i łaźniu — nijakaj zabaronienaj simvoliki nie znajšli. Zatym milicyjanty źniali tablički, na jakich łacinkaj była napisanaja nazva vulicy i numary doma, bo, pa ich słovach, jany pryraŭnoŭvajucca da adzinočnaha niaŭzhodnienaha pikietavańnia. Zatym mužčynu skazali, što jamu treba prajechać u adździeł, kab pastavić podpis, pasadzili ŭ milicejski aŭtamabil i pavieźli ŭ RAUS. Ale dadomu Andrej Dražyn nie viarnuŭsia, ź piatnicy 26 sakavika jon znachodzicca ŭ IČU.
Pa słovach svajakoŭ zatrymanaha, jon budzie znachodzicca ŭ IČU Ivanaŭskaha RAUS da paniadziełka, a ŭ paniadziełak 29 sakavika ŭ 10:00 projdzie sud. Andrej Dražyn — baćka traich dziaciej, dvoje ź ich paŭnaletnija, a voś małodšamu synu tolki 11.
Kamientary