Eks-bankir Viktar Babaryka ŭ svaim pasłańni źviarnuŭsia da svaich prychilnikaŭ, dzie nahadaŭ ab stvareńni im novaj partyi «Razam». Tekst zvarotu raźmieščany na aficyjnym sajcie partyi.
Viktar Babaryka, źviarnuŭšysia ź SIZA KDB da svaich prychilnikaŭ, zaklikaje ich nie spyniacca na paŭdarozie i zaviaršyć stvareńnie partyi «Razam». Pry hetym jon raspavioŭ, što sam nie źjaŭlaŭsia členam padobnych palityčnych abjadnańniaŭ i sumniavaŭsia ŭ ich metazhodnaści ŭ sučasnym śviecie.
«Ja nikoli nie znachodziŭsia ni ŭ jakoj partyi i nie mierkavaŭ, što takaja forma abjadnańnia ludziej maje prava na isnavańnie ŭ XXI stahodździ. Ale biełarusy pakazvajuć, što ja nie mieŭ racyi. Nam patrebna partyja. Ale partyja nie jak samameta, a jak najbolš efiektyŭny instrumient dasiahnieńnia našaj pieramohi. Partyja našaha budučaha, zasnavanaha na praŭdzie, dabryni i svabodzie», — havorycca ŭ zajavie.
Siarod zadač, jakija pavinna vykonvać novaja palityčnaja struktura, Babaryka paznačyŭ pradstaŭleńnie intaresaŭ bolšaści biełarusaŭ, abjadnańnie pad svaim kryłom šmatlikich aŭtanomnych inicyjatyŭ, a taksama zabieśpiačeńnie pracy hrup i abjadnańniaŭ i adnaŭleńnie dziejnaści ŭnutry krainy.
Babaryka zajaviŭ, što vieryć u mahčymaść ažyćciaŭleńnia płanaŭ i nahadaŭ pra toje, jak chutka była stvorana inicyjatyŭnaja hrupa ŭ 10 tysiač čałaviek dla jaho vyłučeńnia kandydatam u prezidenty na letašnich vybarach.
Jon ličyć, što biełaruski narod u žniŭni minułaha hoda «napisaŭ adnu z samych słaŭnych staronak u baraćbie za našu nacyju», a jaho reakcyja na dziejańni ŭładaŭ — padman i hvałt — pryciahnuła ŭvahu ŭsiaho śvietu da prablem Biełarusi.
«My abaviazany zrabić partyju «Razam». Pavinny dapamahčy adno adnamu pavieryć u siabie, u susieda, u svaju krainu. Nielha pakidać rakavuju puchlinu strachu i biezdapamožnaści našym dzieciam i ŭnukam. Tak, heta nie prosta. Žachi, jakija my bačym na vulicach, siejuć ziernie sumnieńniaŭ i nieviadomaści. Adnak nielha zabyvać, što mienavita nieapraŭdanaja žorstkaść z boku ŭłady śviedčyć ab jaje strachu i biaśsilli pierad ułasnym narodam».
Pradstaŭniki štaba Viktara Babaryki zajavili, što buduć sprabavać aficyjna zarehistravać partyju i paviedamili, što ciapier praz aficyjny sajt stvaranaj struktury viaduć zbor zajavak na členstva ŭ joj, dla čaho ŭsim achvotnym nieabchodna budzie zapoŭnić ankietu. Pa ich słovach, u kancy viasny pavinien adbycca ŭstanoŭčy źjezd.
Nahadajem, ab stvareńni partyi «Razam» jašče ŭ kancy žniŭnia minułaha hoda ŭ videazvarocie zajavili Viktar Babaryka i Maryja Kaleśnikava — pa ŭsioj bačnaści, stvareńnie struktury płanavałasia jašče da zatrymańnia eks-bankira.
Ekśpierty pa-roznamu pastavilisia da pierśpiektyvy novaj palityčnaj struktury, u tym liku jaje aficyjnaj rehistracyi ŭładami.
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1212
Kamientary