Naš bijałahičny hadzińnik nastrojeny takim čynam, kab unačy nam chaciełasia spać, a nie jeści. Tamu, kali vy pakutujecie ad načnoha hoładu, tym bolš kali heta rehularnaja źjava, varta razabracca ŭ jaje mahčymych pryčynach.
Pieršaja ź ich — deficyt kałoryj, źviazany z tym, što vy nie spažyvajecie dastatkova ježy ŭdzień abo pierahružajecie siabie fizičnaj nahruzkaj. Niedachop snu taksama moža vyklikać načny hoład: kali vy mała śpicie, uzrovień harmonaŭ hrelinu i leptynu, jakija rehulujuć vaš apietyt, moža vyraści, tłumačyć HuffPost.
Ale časam pryčyna načnych pierakusaŭ źviazanaja nie z sapraŭdnym pačućciem hoładu, a ź psichałohijaj: tak vaša cieła moža adkazvać na stres. Vy pračynajeciesia nočču i šukajecie ježu, kab supakoicca. Tamu važna znajści pryčynu takoha mocnaha stresu.
Kali ž načnyja pierakusy robiacca zusim častymi, naprykład, niekalki razoŭ na tydzień na praciahu niekalkich miesiacaŭ, to heta moža śviedčyć pra sindrom načnoha charčavańnia. Ludzi z takim razładam zvyčajna mała jaduć u pieršaj pałovie dnia, ale spažyvajuć vialikuju častku štodzionnaha racyjonu paśla abiedu. Jany mohuć mieć prablemy z nastrojem, što asabliva zaŭvažna ŭviečary, adčuvać ciažkaści z zasynańniem abo časta pračynacca. Takija ludzi ličać, što im treba niešta źjeści ŭnačy, kab znoŭ zasnuć.
Što rabić z načnym hoładam? Pa-pieršaje, pasprabujcie addavać bolš uvahi adčuvańniu hoładu ŭdzień. Kali vy dastatkova jaście, ale ŭsio roŭna adčuvajecie hoład unačy, dazvolcie sabie nievialiki pierakus za hadzinu-druhuju da snu.
Dobra, kali heta budzie spałučeńnie białkoŭ i vuhlavodaŭ: johurt i miuśli abo piačeńnie z tvarahom. Bolš sytny pierakus moža vyklikać prablemy sa snom. Adnak kali vy adčuvajecie mocny hoład, nie treba siabie zanadta abmiažoŭvać.
Možna pasprabavać zapisvać usiu ježu, jakuju vy spažyvajecie, i pašukać zakanamiernaści pamiž kolkaściu i jakaściu ježy i prystupami načnoha hoładu. Ale kali vy ŭsio roŭna pračynajeciesia nočču i nijak nie možacie zasnuć bieź pierakusu, dyk ježcie. Lepiej pasprabavać niešta lohkaje, naprykład, krekiery, suchafrukty abo tost z arechavaj pastaj.
Kali ž načnyja pierakusy ŭsio ž taki nabyli rehularny charaktar i ničoha nie ratuje, varta pahutaryć pra heta z doktaram, kab vyklučyć mahčymyja prablemy sa zdaroŭjem.
Ciapier čytajuć
Što viadoma pra byłoha palitviaźnia Sakałoŭskaha, jaki pamior u Bierlinie ŭ 47 hadoŭ1
Kamientary