Rakietny kompleks urezaŭsia ŭ viaskovy dom u Asipovickim rajonie — paŭdoma niama
U vioscy Maisiejevičy Asipovickaha rajona ranicaj 5 krasavika rakietny kompleks urezaŭsia ŭ pryvatny dom — i źnios ledź nie pałovu budynka. 85-hadovaja haspadynia doma cudam acaleła —jana ŭ hety momant vyjšła na vulicu. Na miescy avaryi pracavała DAI. Pryjazdžała i chutkaja, bo piensijaniercy stała błaha — padniaŭsia cisk, piša Tut.by.
Jak raspaviała Tut.by dačka ŭładalnicy doma, jana była ŭ maci — znachodziłasia ŭ dvary — kali kala 10 ranicy pačuła žudasny tresk i ŭdar. Vybiehła za płot — i ŭbačyła vajskovuju techniku, jakaja ŭrezałasia ŭ ścianu doma. Pa ščaślivym supadzieńni jaje maci, 85-hadovaja Hanna Mikałajeŭna, jakaja zvyčajna žyvie ŭ domie adna, jakraz u hety momant vyjšła ŭ dvor. I tym samym uratavałasia.
— Kiroŭca hetaj vajskovaj mašyny — zusim małady chłopiec, z terminovaj słužby, napeŭna. Skazaŭ, što jany z asipovickaj vajskovaj čaści 61732. Kaža, jechali kudyści ŭ bok Słucka: ci to pierahaniali mašynu, ci to jašče što. A tut u nas u vioscy pavarot kruty. Ja nie viedaju, ź jakoj chutkaściu jany jechali, choć u nas staić abmiežavańnie ŭ 40 km/h, ale, vidavočna, nie spravilisia z kiravańniem i ŭrezalisia ŭ dom, — kaža dačka Valancina Ryhoraŭna.
Vajskovaja technika — heta taktyčny rakietny kompleks «Kropka-U».
Rakietny kompleks vajskoŭcy ŭžo vyciahnuli z dapamohaj hruzavika. Jany ž skazali, što pakryjuć škodu, dadała žančyna. Pry hetym dla acenki škody čakajuć strachoŭščyka. Pa słovach Valanciny Ryhoraŭny, žyć u domie niemahčyma, jana pakul zabiare maci da siabie ŭ Asipovičy.
— U domie i piečka pajechała, i ściany niama. Ja nie viedaju, u jakim stanie znachodziacca kanstrukcyi ŭ cełym — dla acenki hetaha patrebnyja śpiecyjalisty, — skazała žančyna. — Ale voś vizualna dom «pajechaŭ» — jon pierakošany.
U domie siamja niadaŭna rabiła ramont: u minułym hodzie źmianili šyfier, umacavali biarvieńnie, u hetym — abšyli ścieny i stol hipsakardonam, pamianiali padłohu, litaralna zaŭtra źbiralisia kleić špalery.
Pa słovach dački haspadyni doma, technika asipovickich vajskovych častak časta jeździć praź viosku, pa jakoj prachodzić byłaja daroha vajskovaha pryznačeńnia.
Minabarony paviedamlaje, što viedamstvam raspačataja pravierka pa fakcie DTZ, jakoje adbyłosia padčas maršu rakietnaha dyvizijona adnoj z vajskovych častak na palihon Hožski.
Vajskoviec terminovaj słužby, kirujučy samachodnaj puskavoj ustanoŭkaj, na krutym pavarocie nie spraviŭsia z kiravańniem i začapiŭ vuhał žyłoha doma. U vyniku DTZ nichto nie paciarpieŭ, vajskovaja technika spraŭnaja. Paškodžańni žyłoha doma ramantujucca, adznačajecca ŭ paviedamleńni.
Kamientary