Alaksandr Łukašenka vybraŭ 9 Maja dla padpisańnia dekreta ab pierachodzie paŭnamoctvaŭ u vypadku svajoj hibieli
Pratesty suprać 26-hadovaha kiravańnia Alaksandra Łukašenki nie spyniajucca ad 9 žniŭnia, dnia apošnich prezidenckich vybaraŭ.
Pra padpisańnie dekreta abjaviŭ telehram-kanał pres-słužby Łukašenki. Ale dakumient pakul nie apublikavany na sajcie centra pravavoj infarmacyi.
U vypadku hibieli pieršaj asoby z-za zamachu, ździajśnieńnia akta teraryzmu, źniešniaj ahresii, inšych hvałtoŭnych dziejańniaŭ usie dziaržaŭnyja orhany i ich słužbovyja asoby dziejničajuć u adpaviednaści z rašeńniami Rady Biaśpieki, na pasiadžeńniach jakoha kiruje premjer-ministr.
Pry hetym na terytoryi krainy nieadkładna ŭvodzicca nadzvyčajnaje abo vajennaje stanovišča, a Radaj Biaśpieki vyznačajecca pieralik mier pa ich zabieśpiačeńni. Rašeńni Rady Biaśpieki abaviazkovyja dla ŭsich i patrabujuć biezumoŭnaha vykanańnia.
Asnoŭnym pytańniem budzie pytańnie praviadzieńnia vybaraŭ. Rada Biaśpieki z udziełam kiraŭnikoŭ abłvykankamaŭ prymaje rašeńnie ab ich praviadzieńni.
Dla padpisańnia dekreta Alaksandr Łukašenka vybraŭ Dzień Pieramohi 9 Maja.
Pratesty suprać 26-hadovaha kiravańnia Alaksandra Łukašenki nie spyniajucca ad 9 žniŭnia, dnia apošnich prezidenckich vybaraŭ, na jakija nie byli dapuščanyja i paśla jakich byli źniavolenyja ŭsie asnoŭnyja kankurenty Łukašenki.
U vyniku apazicyju abjadnała žonka adnaho ź viaźniaŭ, Siarhieja Cichanoŭskaha, Śviatłana Cichanoŭskaja. Padčas padaŭleńnia pratestaŭ zahinuła 5 ich udzielnikaŭ, adbyłosia 34 911 zatrymańniaŭ, było zaviedziena bolš za 3000 kryminalnych spraŭ palityčnaha charaktaru. Jeŭropa nie viedała takoj chvali palityčnych represij ad časoŭ fašysckaha režymu «čornych pałkoŭnikaŭ» u Hrecyi 1970-ch.
Ciapier čytajuć
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom23
Kamientary