Milicyja zatrymała piensijanierku kala mahiły Bykava, ale sudździa adpraviła spravu na dapracoŭku
14 maja sudździa Pieršamajskaha rajona Anastasija Lajkoŭskaja razhladzieła spravu 61-hadovaj Iryny Karniejevaj. Zhodna z pratakołam, Iryna Iharaŭna «ŭziała aktyŭny ŭdzieł u pikietavańni, ustalavaŭšy BČB-ściah na nadmahilli Vasila Bykava». Spadaryniu Irynu zatrymali prosta na mohiłkach, a ŭ Pieršamajskim RUUSie na jaje skłali pratakoł pa č. 3 art. 24.23 KaAP.
Na sudzie Iryna patłumačyła, što dobra pamiataje dzień pachavańnia Bykava, kali jaho trunu nakryli BČB-ściaham. Tamu jana vyrašyła zaviazać kvietki stužkami mienavita hetaj rasfarboŭki. Da mahiły piśmieńnika žančyna 9 traŭnia ŭskłała try čyrvonyja ciulpany, paviedamlajuć pravaabaroncy.
Pa słovach Iryny, ściah jana nie ŭstaloŭvała, a tolki ŭskłała kvietki. Jana ličyć heta vyrazam svajoj pavahi, a nie pikietavańniem. Piensijanierka znachodziłasia kala nadmahilla tolki 5 chvilin. U hety momant da Karniejevaj padyšli dva supracoŭniki milicyi i adviali ŭ słužbovuju mašynu. Pa darozie ŭ jaje pytalisia, ci viedaje jana pra akcyju, na što Iryna adkazała admoŭna.
U sud asabista pryjšoŭ i śviedka-milicyjant, jaki paćvierdziŭ, što Iryna ŭstalavała ściah i raspaviadaŭ sudu pra zakliki ŭ destruktyŭnych th-kanałach. Taksama pry zatrymańni śviedka prapanavaŭ žančynie zabrać kvietki dla dokazu jaje viny, ale ŭ pratakole napisali tolki pra BČB-ściah.
Iryna kala nadmahilla Bykava paznajomiłasia z mužčynam, jaki asabista viedaŭ piśmieńnika. U momant ich hutarki i adbyłosia zatrymańnie, tamu žančyna paprasiła znajomaha pryjści ŭ sud u jakaści śviedki. Na sudzie jon paćvierdziŭ, što nijakaj simvoliki Karniejeva nie ŭskładała.
Piensijanierka pasprabavała źviarnucca da śviedki-milicyjanta:
— Ja chacieła b daviedacca, što adčuvaje čałaviek, jaki chłusić sudu?
— Pytańnie zdymajecca.
Śviedka-milicyjant sudu paćvierdziŭ, što zatrymlivaŭ žančynu kala 19-j hadziny, ale ŭ pratakole havorka idzie pra 16 hadzin. U Iryny atrymałasia dakazać, što ŭ 16:00 jana znachodziłasia ŭ inšym miescy, dziakujučy čeku.
Advakat žančyny źviarnuŭ uvahu suda na charakternyja pamyłki ŭ pratakole i dadaŭ, što pytańni ab kvietkach i stužkach nijak nie adnosiacca da spravy, bo Irynu abvinavačvajuć kankretna ŭ ustanaŭleńni ściaha. Paśla tłumačeńniaŭ advakata sudździa Lajkoŭskaja vyrašyła viarnuć spravu na dapracoŭku.
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ88
Kamientary