U advarotnym vypadku miarkuje źviarnucca ŭ sud abo skaracić abjomy pastaŭki.
Adpaviedny list u Minsk užo nakiravany, paviedamiŭ kiraŭnik praŭleńnia «Hazproma» Alaksiej Miller na pres-kanfierencyi ŭ Maskvie 26 červienia.
U vypadku niepahašeńnia doŭhu pastaŭki mohuć być spynienyja.
«Doŭh Biełarusi składaje 244 młn dalaraŭ, i my nakiravali list z patrabavańniem pahasić hety doŭh», — pryvodzić RIA «Naviny» słovy Millera.
«My čakajem kanstruktyŭnaha adkazu, — padkreśliŭ jon. — Spadziajemsia, što nazapašanaja zadoŭžanaść z pačatku hodu budzie pahašana. U advarotnym vypadku my budziem dziejničać u adpaviednaści ź dziejučym kantraktam.
Havorka idzie pra toje, što my možam źviarnucca ŭ sud, taksama kantraktam praduhledžana mahčymaść i skaračeńnie abjomaŭ pastaŭki».
Miller abvierhnuŭ infarmacyju pra vusnuju damoŭlenaść pra siaredniehadavuju canu na haz pamiž Rasijaj i Biełaruśsiu:
«Ź biełaruskaha boku vy čujecie słovy, što jość niejkaja damoŭlenaść pra toje, što Biełaruś budzie płacić za haz pa niejkaj siaredniaj canie 50 dalaraŭ za tysiaču kubamietraŭ. Tak, sapraŭdy padčas pieramovaŭ na vysokim uzroŭni hetaje pytańnie abmiarkoŭvałasia, ale tak i nie znajšło nijakaha adlustravańnia ŭ dapaŭnieńniach da kantraktu, i na siońnia u nas z našymi biełaruskimi kalehami dziejničaje kantrakt, u adpviednaści ź jakim jany pavinny płacić pa formule cany ŭ adpaviednaści z papravačnym kaeficyjentam na 2009 hod».
26 červienia vice-premjer Biełarusi Uładzimir Siamaška paviedamiŭ, što Biełaruś prapanoŭvaje «Hazpromu» jurydyčna aformić siaredniehadavuju canu na haz dla Minska.
«Biełaruś prapanoŭvaje «Hazpromu» jurydyčna zamacavać u vyhladzie dadatkovaha pahadnieńnia da kantrakta vusnuju damoŭlenaść prezidentaŭ Biełarusi i Rasii ab apłacie Minskam hazu sioleta pa siaredniehadavoj canie», — skazaŭ Siamaška.
Jon nahadaŭ, što ab apłacie Biełaruśsiu rasijskaha hazu pa siaredniehadavoj canie prezidenty Alaksandr Łukašenka i Dźmitryj Miadźviedzieŭ damovilisia ŭ sakaviku 2009 hoda na sustrečy ŭ Zavidavie.
«Prezidenty dźviuch krain damovilisia, premjery damovilisia. U vas (u «Hazpromie». — BiełaPAN.) na stale lažyć dadatkovaje pahadnieńnie da kantrakta, tamu, kali łaska, padpišycie. My punktualna vykonvajem damoŭlenaści i vypłačvajem pa 150 dołaraŭ za tysiaču kubamietraŭ, z druhoha paŭhodździa pastupova pačynajem pahašać raniej utvoranuju zapazyčanaść», — skazaŭ Siamaška.
Vice‑premjer padkreśliŭ, što dadzienaja pazicyja vykładziena ŭ liście «Hazpromu» ŭ adkaz na atrymanaje «Biełtranshazam» pasłańnie z patrabavańniem «nieadkładna pahasić zapazyčanaść na 234 młn. dalaraŭ, jakaja ŭtvaryłasia ŭ vyniku taho, što kantraktnaja cana hazu ŭ studzieni—krasaviku pieravyšała siaredniehadavuju canu, jakaja faktyčna apłačvajecca Minskam». Pry hetym Siamaška zaznačyŭ, što Biełaruś užo pastupova vypłačvaje zapazyčanaść, i da listapada 2009 hoda jana budzie całkam pahašanaja.
Vice-premjer adznačyŭ, što cana rasijskaha hazu dla Biełarusi pryviazana da suśvietnych cenaŭ na naftu. «Sioleta my skočyli adrazu na canu 210 dalaraŭ za tysiaču kubamietraŭ. Z 1 krasavika cana skłała 157 dalaraŭ, z 1 červienia — 115», — skazaŭ Siamaška. Pavodle jaho słovaŭ, da kanca hodu košt rasijskaha hazu składzie prykładna 119 dalaraŭ.
Kamientary