Za majki i zvanočak. Haspadyniu kramy «Admietnaść» asudzili na 2000 rubloŭ štrafu
Haspadyniu kramy «Admietnaść» Volhu Vieramiejenka sudzili ŭ budynku RAUS 18 červienia za «pikietavańnie». Rečavymi dokazami paličyli futbołki z vyjavaj «Pahoni», zvanočak, banier. Raniej Volha praviała troje sutak u izalatary, pakul jaje nie adpuścili da suda. Paśla hetaha ŭ jaje zdaryŭsia hipiertaničny kryz — Volhu nakiravali ŭ balnicu, piša Hrodna.life.
Try futbołki z vyjavaj Kastusia Kalinoŭskaha Volzie viarnuli. Rečy, pryznanyja dokazami, pa rašeńni suda źniščać. Ahułam milicyjanty zabrali tavar na sumu 3000 rubloŭ.
Sudziła Volhu sudździa z suda Leninskaha rajona Alena Piatrova. Jana ŭvajšła ŭ budynak praz čorny ŭvachod. Śviedkam pa spravie prachodziŭ supracoŭnik RAUS Vadzim Nalivajka. U spravie ŭdzielničaŭ supracoŭnik RAUS Andrej Pihulski. U vyniku Volhu asudzili na 70 bazavych vieličyń (2030 rubloŭ) pa art.24.23 KaAP. Volha budzie abskardžvać rašeńnie suda.
Vyjaznoje sudovaje pasiadžeńnie prajšło ŭ budynku Leninskaha RAUS na vuł. Dubko, 5. Mienavita tudy vyklikali pa sms Volhu. Ź joj u RAUS pryjšli kala 20 čałaviek. Ich prapuścili, ale paźniej na pasiadžeńnie vyklikali tolki Volhu Vieramiejenka i jaje advakata. Supracoŭnica milicyi ihnaravała pytańni ad naviedvalnikaŭ, jakija žadali trapić na praces. «Mnie skazali paklikać tolki Vieramiejenka».
— Heta značyć, heta zakrytaje sudovaje pasiadžeńnie?
— Vy možacie rastłumačyć, čamu my nie možam patrapić na praces? Vy adkažacie na pytańnie?
Paźniej inšy supracoŭnik skazaŭ, što heta pytańnie vyrašaje kiraŭnictva. Praź niekalki chvilin jon vyjšaŭ i pieradaŭ, što raz pasiadžeńnie pačałosia, na jaho ŭžo nie patrapić. «Tak atrymałasia», — skazaŭ milicyjant.
«Z pryčyny taho, što ŭ nas režymny abjekt, epidemijałahičnaja abstanoŭka, prośba vialikaj kolkaściu nie znachodzicca. Albo rastusujciesia, albo na vulicu», — taksama paprasiŭ jon.
Chto mienavita z kiraŭnictva heta pieradaŭ, milicyjant nie skazaŭ: «Chto na provadzie byŭ, mnie nie pradstavilisia. Pa hołasie ja nie vyznačaju».
Čamu Volhu sudzili ŭ RAUS, a nie ŭ sudzie, joj z advakatam nie patłumačyli.
Volhu Vieramiejenka zatrymali 3 červienia i pakinuli na troje sutak u izalatary. U kramie «Admietnaść», dzie pradajecca ŭ tym liku nacyjanalnaja simvolika, praviali ahlad. Pry hetym supracoŭniki AMAP zajšli ŭ redakcyju Hrodna.life, jakaja susiedničaje z «Admietnaściu», i nie dazvalali supracoŭnikam vychodzić i karystacca srodkami suviazi.
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje23
Kamientary