Polskija ŚMI: Jak skarystać budaŭničy bum u Biełarusi?

Paśla apošniaj spravazdačy PMR «Budaŭničy siektar Biełarusi ŭ 2009 hodzie — prahnozy raźvićcia na 2009‑2011», pačałosia aktyŭnaje abmierkavańnie biełaruskaha budaŭničaha rynku ŭ polskich srodkach masavaj infarmacyi.

Jak adznačaje «Gazeta Wyborcza», raniej polskija inviestycyi išli ŭ asnoŭnym va Ukrainu, ale z‑za hłybokaha kryzisu budaŭničy rynak tam skaraciŭsia bolš čym na 55 pracentaŭ. Rasijski budaŭničy rynak skaraciŭsia prykładna na adnu piatuju častku, a rynak u Kazachstanie na 8 pracentaŭ. Tym časam u Biełarusi nazirajecca budaŭničy bum. Čym patłumačyć hety fienomien?

Pavodle spravazdačy PMR (kampanii, jakaja zajmajecca pradstaŭleńniem rynkavaj infarmacyi mižnarodnym kampanijam), u krainach sa słabaj budaŭničaj pramysłovaściu prajekty padtrymlivalisia raniej praz zamiežny kapitał i hałoŭnym čynam u formie kredytaŭ. Kali ŭ vyniku hłabalnaha finansavaha kryzisu hetyja krynicy finansavańnia vyčarpalisia, mnohija budaŭničyja prajekty byli prypynienyja.

Pavodle «GW», u Biełarusi bolšaść finansavych inviestycyj idzie z centralnaha biudžetu, tamu ich realizacyja praciahvajecca. Robiert Obietkan , analityk PMR u halinie budaŭničaha rynku, adznačaje, što rynak nieruchomaści Biełarusi nie taki raźvity, jak u inšych krainach SND, tamu na im niama tych ža źjaŭ, što nazirajucca u Rasii i Ukrainie: chaatyčnaha rostu haradoŭ ci pierahrevu rynku. Jon adznačaje, što Biełaruś stała metavym abjektam ekspansii mnohich zamiežnych firmaŭ, jakija chočuć ekspartavać siudy budaŭničyja materyjały i techniku, a taksama vykupić miascovyja budaŭničyja kampanii i navat stvaryć novyja.

Prezident Polskaj handlova‑pramysłovaj pałaty budaŭnictva Źbihnieŭ Bachman, jaki źjaŭlajecca dobrym znaŭcam uschodnich rynkaŭ, upeŭnieny, što

budaŭničy bum u Biełarusi vykarystajuć taksama polskija vytvorcy budaŭničych materyjałaŭ, u jakich pačalisia prablemy ŭ suviazi z kryzisam. — Vy pavinny vykarystoŭvać toj fakt, što naša pradukcyja maje tam vielmi dobruju reputacyju. — kaža jon.

U jakaści prykładu Bachman pryvioŭ fakt taho, što były pasoł Biełarusi ŭ Polščy i ciapierašni ministar kultury Pavał Łatuška pryvioz z Polščy apracoŭčyja materyjały dla svajho domu pad Minskam. Nie pužaje polskich ekśpiertaŭ i ciažkaści ŭ suviazi ź viadzieńniem biźniesu ŭ Biełarusi. Robiert Obietkan pryznaje, što heta sprava nialohkaja, ale tym časam adznačaje, što naša kraina stała bolš zručnaj dla viadzieńnia biźniesu, čym Rasija i Ukraina. A Źbihnieŭ Bachman źviarnuŭ uvahu na libieralizacyju biełaruskaj ekanomiki — spraściłasia zakanadaŭstva, jakoje tyčycca praviadzieńnia budaŭničych inviestycyj i praviadzieńnia tendaraŭ.

Sajt inwestycje.pl adznačaje, što ahułam u 2009 hodzie Biełaruś płanuje ŭvieści 52 reformy, nakiravanych na libieralizacyju ekanomiki. U tym liku, ułady źbirajucca spraścić pracedury siertyfikacyi i pracedury, źviazanyja z prajektavańniem, budaŭnictvam i ŭviadzieńniem u ekspłuatacyju budynkaŭ , što biezumoŭna pabolšyć kolkaść zamiežnych inviestycyj u Biełarusi.

• 0
• 0
• 0
• 0
• 0
• 0
• 0
• 0