Kolkaść represavanych praciŭnikaŭ Alaksandra Łukašenki nabližajecca da 50 tysiač

U lipieni ich było 327, u červieni — 246, u mai — 332, u krasaviku — 304. U lutym zatrymlivali nie mienš za 511 čałaviek, u sakaviku — 1139 čałaviek.

Takim čynam, ad času prezidenckich vybaraŭ z paviedamleńniaŭ MUS i śpisaŭ pravaabaroncaŭ viadoma pra nie mienš za 36 211 zatrymańniaŭ.

Što datyčyć kryminalnych spraŭ, to na 1 vieraśnia pravaabaroncam viadomyja 1592 fihuranty kryminalnych spraŭ palityčnaha charaktaru, jakija znachodziacca pad śledstvam abo ŭžo asudžany (+260 u paraŭnańni z 1 lipienia). Hetaja ličba fatalna niapoŭnaja, bo pry takim maštabie vałanciory i ŚMI niazdolnyja daviedacca pra ŭsie imiony, asabliva ŭ pravincyi. Pravaabaroncy havorać, što ličba ŭ niekalki tysiač čałaviek vyhladaje realistyčnaj.

Viadoma pra 1041 źniavolenaha pa kryminalnych spravach palityčnaha charaktaru (+234 proci 1 lipienia).

667 ź ich pravaabaroncy pa vynikach detalovaha vyvučeńnia spraŭ na hety momant pryznajuć palitviaźniami (+138 proci 1 lipienia).

Siarod suśvietna viadomych biełaruskich palitviaźniaŭ — asudžanaja na 12 hadoŭ źniavoleńnia Maryja Kaleśnikava, paplečnica Śviatłany Cichanoŭskaj. Jana praz advakata raskazała, što jaje sprabavali siłaj vyvieźci za miažu, ale jana na pahraničnym šłahbaumie parvała pašpart. Razam ź Cichanoŭskaj jana naminavanaja na Nobieleŭskuju premiju miru za svaju rolu ŭ arhanizacyi mirnaha ruchu za svabodnyja vybary i hramadzianskija pravy.

Za kratami ŭžo amal hod zastajecca i muž Śviatłany Cichanoŭskaj, Siarhiej.

Užo amal hod u źniavoleńni zastajucca taksama takija apanienty Alaksandra Łukašenki, jak Mikałaj Statkievič i Pavieł Sieviaryniec. A Viktar Babaryka, jakoha ŭ 2020-m mnohija ličyli asnoŭnym supiernikam Alaksandra Łukašenki, atrymaŭ 14 hadoŭ źniavoleńnia.

Za kratami — i hramadzianka Šviejcaryi biełaruskaha pachodžańnia Natalla Chierše, vina jakoj u tym, što jana sarvała bałakłavu z amapaŭca, jaki zatrymlivaŭ mirnych demanstrantak.

Vializnaje abureńnie ŭ susiedniaj Polščy vyklikali aryšty dziejačaŭ intelihiencyi ź liku polskaj nacyjanalnaj mienšaści.

Za kratami znachodziacca jak minimum 28 žurnalistaŭ i supracoŭnikaŭ ŚMI, niekatoryja ź ich — łaŭreaty nacyjanalnych i mižnarodnych žurnalisckich premij. Ułady spynili vychad usich niezaležnych drukavanych haziet, niezaležnych TB i radyjo ŭ krainie niama ad 1996 hoda. U mai byŭ zakryty samy papularny internet-partał krainy — Tut.by. U lipieni była razhromlenaja «Naša Niva». Na siońnia ŭnutry Biełarusi bolš nie zastałosia realna dziejnych niezaležnych hramadska-palityčnych vydańniaŭ.

Kali dadać da kolkaści zatrymanych ličbu zvolnienych z pracy ci vyklučanych z VNU za palityčnuju aktyŭnaść, to ahulnaja ličba zakranutych palityčnymi represijami pieravysiła 40 tysiač čałaviek. Dakładnych źviestak pra kolkaść ludziej, jakija emihravali pa palityčnych matyvach, niama. Ale statystyka atrymańnia adpaviednych viz i dazvołaŭ na žycharstva ŭ krainach Jeŭrasajuza i Ukrainie daje padstavy dumać, što takich ludziej — tysiačy.

• 0
• 0
• 0
• 0
• 0
• 0
• 0
• 0