20-hadovamu studentu Arciomu Bajarskamu, jaki admoviŭsia ad prezidenckaj stypiendyi, dali piać hadoŭ kałonii
U Minskim haradskim sudzie 9 śniežnia ahučyli prysud 20-hadovamu Arciomu Bajarskamu. Sudździa Alena Šylko pryznała eks-studenta 2-ha kursa chimfaka BDU vinavatym ŭ «stvareńni i kiraŭnictvie ekstremisckim farmavańniem i ŭdziele ŭ dziejańniach, jakija hruba parušajuć hramadski paradak».
Sam sud prachodziŭ u zakrytym režymie pa chadajnictvie prakurora Volhi Dyndzilevič. Viadoma tolki, što Arcioma abvinavačvali ŭ administravańni telehram-kanała «Maja kraina Biełaruś» i telehram-čata «Ja vychožu/MKB», a taksama va ŭdziele ŭ maršy 25 kastryčnika 2020 hoda.
Za kratami chłopiec utrymlivajecca vosiem z pałovaj miesiacaŭ.
Chto taki Arciom Bajarski
20-hadovy Arciom Bajarski, uradženiec Hrodna, da zatrymańnia vučyŭsia na chimičnym fakultecie BDU. Jon čatyry razy stanaviŭsia stypiendyjatam śpiecyjalnaha fondu prezidenta pa padtrymcy talenavitaj moładzi i adoranych studentaŭ i navučencaŭ. Razam ź inšymi studentami, Arciom admoviŭsia ad hetaj stypiendyi.
Hod tamu paśla Maršu piensijanieraŭ jaho žorstka zatrymali, źbili i aryštavali na 15 sutak pavodle «narodnaha» artykuła 24.23 KaAP. U svaim dziońniku Arciom padrabiazna apisaŭ źbićcio ŭ Leninskim RUUSie:
«Kali zaviali ŭ bus, mianie adrazu ž pačali bić. Bili ŭ asnoŭnym kułakami pa tvary, taksama zakranuła levuju ruku i levy bok. Pastavili siniak pad levaje voka, taksama byŭ mocny bol u rajonie levaj skroni. Nieviadomyja ŭ čornym patrabavali nazvać, dzie ja žyvu i vučusia, adnačasna absypajučy mianie tumakami i kruciačy palcy. Potym na dvuch palcach byŭ mocny aciok i jany baleli.
Pakul vieźli ŭ RUUS, u moj bok sypalisia roznaha kštałtu pahrozy, abrazy. Pahražali, što adličać z univiersiteta i ja pajdu ŭ vojska. Śćviardžali, što ja prapłačany. Ja vyrašyŭ zhadžacca z usim ich słaviesnym patokam. Zdajecca, heta krychu supakojvała ich złość, i jany pierastavali mianie bić.
U mianie znajšli ściah Chabaraŭska, zrabili ŭ im dzirku i napialili mnie na hałavu. U takim «ubory» mianie dastavili ŭ RUUS Leninskaha rajona. Kali ja vyjšaŭ z busa, adčuvałasia, što ŭ mianie voka było prypuchłym i vielmi mocna baleła hałava».
Źbivali, kab atrymać pakazańni
Druhi raz Arcioma zatrymali sioleta napiaredadni Dnia voli — 24 sakavika. Ranicaj u internat da jaho pryjšli siłaviki — padstavaj staŭ bieła-čyrvona-bieły ściah, jaki nibyta chtości vyviesiŭ u pakoi. Usich studentaŭ pakłali na padłohu i zakavali ŭ kajdanki, ale zabrali tolki Arcioma. Jaho asudzili na 25 sutak pa art. 24.23 KaAP, ale potym vystavili abvinavačvańnie pa kryminalnym artykule za «stvareńnie abo kiraŭnictva ekstremisckim farmavańniem».
Z Arciomam zapisali «pakajalnaje videa», dzie jon pryznajecca ŭ administravańni telehram-kanała i čata «Maja kraina Biełaruś» (Ja vychožu/MKB). Ale adčas dopytu 19 krasavika chłopiec paviedamiŭ advakatu, što jaho źbili dubinkami, kab atrymać videa.
Sam Bajarski patłumačyŭ na apytańni, što jaho bili ŭ budynku HUBAZiK na vulicy Revalucyjnaj, kali apytvali, ci datyčny jon da telehram-kanała «Strajkam chimfaka».
Niahledziačy na toje, što ekśpiertyza vyjaviła ŭ Bajarskaha siniaki na jahadzicach, halonkach i plačy, Centralny rajonny adździeł SK admoviŭ studentu va ŭzbudžeńni kryminalnaj spravy suprać supracoŭnikaŭ HUBAZiKa.
27 kastryčnika, praz paŭhoda paśla zatrymańnia Arcioma Bajarskaha i vystaŭleńnia jamu abvinavačvańnia pa art. 361-1 Kryminalnaha kodeksa, MUS pryznała ekstremisckim farmiravańniem telehram-kanał «Maja kraina Biełaruś» i čat «Ja vychožu/MKB».
Ciapier čytajuć
«Adpuścicie, kali łaska, syna!» Amierykanca z amniezijaj, jaki nielehalna pryjechaŭ u Biełaruś, nie addajuć maci5
Kamientary