«Nijakaha dačynieńnia nie majem», — arhanizacyja «Nadzieja» pra vypadak kala pasolstva Biełarusi ŭ Łondanie
MZS Biełarusi u paniadziełak zajaviła pra napad na svajo pasolstva i źbićcio konsuła ŭ Łondanie viečaram 19 śniežnia. U palicyi Bi-bi-si paviedamili ab zatrymańni adnaho čałavieka. Biełaruskija ŭłady abvinavacili ŭ napadzie biełaruskuju ž dyjasparu, jaje pradstaŭniki zajavili, što nie majuć da hetaha nijakaha dačynieńnia.
«Adnamu z supracoŭnikaŭ pasolstva byli naniesienyja surjoznyja cialesnyja paškodžańni, spatrebiłasia terminovaja miedycynskaja dapamoha. Va ŭstanovie achovy zdaroŭja dyjahnastavany pierałom nosa, strasieńnie mozhu lohkaj stupieni i traŭmatyčny pierałom zuba», — zaznačałasia va ŭčorašniaj zajavie MZS.
U praŭładnych telehram-kanałach źjaviłasia videa na jakim možna ŭbačyć hrupu mužčyn, jakija sabralisia la budynka ŭ łondanskim rajonie Kiensinhtan. Adzin ź ich patrabuje, kab Łukašenka syšoŭ, čutnaja niecenzurnaja łajanka. Samoha momantu źbićcia na videa niama.
Dniom 19 śniežnia kala budynka pasolstva sapraŭdy prachodziła akcyja pratestu, ale jana zaviaršyłasia biez zdareńniaŭ i da incydentu.
U napadzie MZS Biełarusi abvinavaciła «radykalnuju emihranckuju hrupoŭku «Nadzieja»». Havorka viadziecca pra supolnaść biełarusaŭ u Vialikabrytanii, jakaja vystupaje za spynieńnie represij i novyja vybary ŭ Biełarusi. U joj naličvajecca 600 čałaviek.
U samoj «Nadziei» Bi-bi-si zajavili, što nie majuć nijakaha dačynieńnia da incydentu. «My aśviatlajem akcyi, ale nie źjaŭlajemsia arhanizataram kožnaj. My nie viedajem, chto ŭčyniŭ pravakacyju — hetym budzie zajmacca palicyja i šukać vinavatych ludziej pa kamierach», — skazała adna z pradstaŭnic supolnaści.
Jana dadała, što pryjšła ŭ žach ad hetaj naviny: «Hetyja ludzi [napadniki] nijak nie adnosiacca da našaha čata biełarusaŭ u Vialikabrytanii, ale tym samym sprabujuć ačarnić słova «Nadzieja», našu reputacyju ŭ Vialikabrytanii».
U łondanskaj palicyi Bi-bi-si skazali, što im paviedamili pra biesparadki, jakija adbyvajucca kala pasolstva Biełarusi ŭ niadzielu kala 19.40 pa miascovym časie.
«Supracoŭnik [pasolstva] paviedamiŭ, što padvierhsia napadu i atrymaŭ traŭmu tvaru. Niepadalok byŭ zatrymany i ŭziaty pad vartu adzin mužčyna», — zajavili ŭ palicyi, dadaŭšy, što padrabiaznaści zdareńnia vyśviatlajucca.
Kamientary