Pastaŭki pradukcyi «Biełaruśkalija» ŭ Paŭdniovuju Kareju mocna vyraśli paśla 2020 hoda, adnak amal całkam spynilisia ŭ śniežni 2021-ha, piša «Radyjo Svaboda».
Fota: znyata / depositphotos.com
Pavodle źviestak ambasady Biełarusi ŭ Respublicy Kareja, na praciahu apošnich dziesiaci hadoŭ tavarazvarot pamiž krainami amal nie źmianiaŭsia. Biełaruś pastaŭlała ŭ azijackuju krainu tavaraŭ prykładna na 40 miljonaŭ dalaraŭ štohod, nabyvała ŭtraja bolš.
Situacyja pačała mianiacca z kanca 2020 hoda, kali pakazčyki ekspartu i impartu spačatku zraŭnialisia, a paśla salda rezka ssunułasia na karyść Biełarusi. U studzieni 2021 hoda Biełaruś pastaviła ŭ Kareju tavaraŭ prykładna na 3 miljony dalaraŭ, a ŭ lutym užo amal na 11 miljonaŭ. Dalej pakazčyki źmianialisia, ale bujnyja ŭzdymy zachoŭvalisia. U lipieni 2021 hoda Biełaruś pradała karejcam svajoj pradukcyi amal na 15 miljonaŭ — rekord za niekalki dziesiacihodździaŭ.
Pośpiechi Biełarusi ŭ handli z Karejaj supadajuć pa časie z rezkim rostam pastavak kalijnych uhnajeńniaŭ. Kali ŭ studzieni 2021 hoda z Salihorska ŭ Kareju pryvieźli pradukcyi «Biełkalija» mienš jak na 1 miljon dalaraŭ, to ŭžo ŭ lutym taho ž hoda ahulny košt pastavak dasiahnuŭ 10 miljonaŭ. A ŭ pikavym dla handlu pamiž krainami lipieni 2021-ha — amal 13 miljonaŭ dalaraŭ.
Ahułam za ŭvieś 2021 hod Biełaruś pastaviła ŭ Paŭdniovuju Kareju kalijnych uhnajeńniaŭ na 65 miljonaŭ dalaraŭ. U 2020 hodzie było mienš jak na 30 miljonaŭ, a ŭ «dakavidnyja» 2017—2018 — krychu bolš za 30 miljonaŭ štohod. Rost bolš jak udvaja.
Ale ŭ apošni miesiac 2021 hoda pastaŭki raptoŭna abvalilisia amal da nula. Kali ŭ listapadzie Kareja nabyła ŭ Biełarusi kalijnych uhnajeńniaŭ amal na 12 miljonaŭ dalaraŭ, to ŭ śniežni — tolki na 8 tysiač. Statystyka za pieršy miesiac 2022 hoda pakul nie publikavałasia.
4 lutaha 2022 hoda davierčyja listy prezidentu Paŭdniovaj Karei Mun Čže Inu ŭručyŭ novy ambasadar Biełarusi ŭ hetaj krainie Andrej Čarniecki. Da pryznačeńnia na pasadu ambasadara Andrej Čarniecki 24 hady prasłužyŭ u orhanach dziaržaŭnaj biaśpieki. Ci dapamoža jamu raniejšy pracoŭny dośvied palepšyć handlovy bałans, pakaža čas.
Novym ambasadaram u Kareju Łukašenka pryznačyŭ specsłužbista z 24-hadovym stažam.
Kamientary