Palitviazień Mikałaj Kazłoŭ: Umovy źniavoleńnia stali paharšacca
Siastra Mikałaja Kazłova, lidara Abjadnanaj hramadzianskaj partyi, raspaviała žurnalistam «Narodnaj Voli»: «Brat paviedamiŭ, što ŭmovy stali paharšacca».
Staršyniu AHP asudzili na try miesiacy za toje, što jon nie pahadziŭsia padpisać papieru ab narazhałošvańni źmiestu jaho dopytu śledčym. Abarona Kazłova padavała apielacyju, adnak vyšejšaja instancyja pakinuła prysud u sile.
Adbyvać pakarańnie ŭ baranavickim SIZA, dzie palityk znachodzicca da hetaha času, jon pačaŭ 28 śniežnia 2021 hoda.
— Brat paviedamiŭ, što jość prablema z atrymańniem karespandencyi, — raspaviała «Narodnaj Voli» Ina, siastra Mikałaja Kazłova. — Jamu addajuć tolki listy ad mianie i ad maci, a taksama prapuścili dva listy ad adnapartyjki. Bolš ničoha nie addajuć, chacia mnie mnohija kažuć, što pišuć Mikałaju. Skažam tak, stvarajecca peŭnaja infarmacyjnaja błakada.
— Jakija naviny paviedamiŭ brat u apošnim liście?
— Mikałaj sprabuje asprečyć toje, što jaho pryznali «schilnym da ekstremizmu». Ciapier čakaje adkazu.
U kamiery brat znachodzicca adzin — hetak ža, jak i na prahułkach. Chacia prahułkami heta, pa vialikim rachunku, nazvać składana. Mikałaj napisaŭ:
«U lepšym vypadku 2—3 razy na tydzień na 30—40 chvilin traplaju na pavietra». Chacia, pavodle ŭstanoŭlenych zakonam praviłaŭ, pavinny być štodzionnyja prahułki pa paŭtary hadziny.
Taksama napisaŭ tryvožny dla mianie radok: «Pa vialikim rachunku, ŭmovy ŭtrymańnia ciarpieć možna, chacia ŭ apošni čas jany stali paharšacca. Padrabiaznaści pieradam paźniej…»
— Raniej Mikałaj skardziŭsia na toje, što ŭ kamiery pastajanna hučna pracuje radyjo…
— «Radyjokatavańnie» praciahvajecca, u hetym płanie ničoha nie źmianiłasia. Brat paviedamiŭ, što «časam huk robiać krychu cišejšym, a časam ravie, jak na tancach u kłubie, a tamu možna padumać, što znachodzišsia ŭ varjatni». A voś navin pa radyjo nie pieradajuć. Vidać, heta niejkaja miascovaja turemnaja radyjokropka.
Napisaŭ, što ŭ izalatary majecca biblijateka, ale knihi treba zakazvać «uciomnuju». Naprykład, knihu možna zakazać, ale nie viadoma, ci budzie jana ŭ najaŭnaści. Dobra jašče, što zachapiŭ z saboj knihu Uładzimira Karatkieviča, jakuju napiaredadni padaryli jamu siabry.
Pieradali bratu akulary (śviatło ŭ kamiery drennaje), hadzińnik. Uvohule, u mianie zastałasia tolki adna dazvolenaja pieradača dla Mikałaja, ale čakajem jaho na voli. Bolšuju častku pakarańnia jon užo adsiadzieŭ…
Kamientary