Znajomy korm, utulnaja pieranoska, leki. Vieterynar tłumačyć, jak dapamahčy žyviołam u stresavych situacyjach

Vieterynar Anton Šamienkaŭ razam z žonkaj Hannaj stvaryli vałanciorski prajekt, kab dapamahać hadavancam biełarusaŭ za miažoj. Ciapier para kansultuje biełarusaŭ i ruskamoŭnych emihrantaŭ pa ŭsim śviecie, a taksama ŭkraincaŭ, jakija ciapier sa svaimi žyviołami apynulisia ŭ zonach bajavych dziejańniaŭ.

Što zrabić, kab vyvieźci žyviołu za miažu?

U telehram-kanale «VietInfo» ciapier šmat infarmacyi, jak vyvieźci svaich hadavancaŭ u roznyja krainy. Anton raspaviadaje, što nieabchodna, kab vyjechać ź Biełarusi ŭ krainy ES.

Pavialičyć

«Usio nie tak składana, jak padajecca. Spačatku treba kupić pašpart, lepš za ŭsio heta zrabić u dziaržaŭnaj vieterynarnaj stancyi. Paśla pastavić čyp — heta kapsuła, u jakoj utrymlivajecca infarmacyja pra žyviołu, stan jaje zdaroŭja. Na miažy sčytajuć infarmacyju i zaniasuć u mižnarodnuju bazu, kab inšyja krainy mahli bačyć, jakaja žyvioła da ich zajazdžaje. Dalej treba zrabić vakcynu ad šalenstva, jakuju abaviazkova patrabujuć krainy ES. Paśla vakcynacyi nieabchodna budzie pačakać 21 dzień karancinu, bo kali pajechać raniej, vas prosta nie puściać za miažu».

Nastupny krok — siertyfikat.

«Za dzień da vyjezdu za miažu vam treba znoŭ pajści ŭ dziaržaŭnuju vieterynarnuju stancyju i ŭziać śpiecyjalny siertyfikat, u jakim budzie pakazany biahučy stan zdaroŭja hadavanca.

Jon dziejničaje tolki sutki. Uziali hetuju papieru, i pajechali, ničoha składanaha niama. Adziny momant: ES patrabuje adnu vakcynu ad šalenstva, ale kali čałaviek płanuje viarnucca ŭ Biełaruś, to biełaruskija pamiežniki ŭžo spytajuć astatnija vakcyny, jakija pavinny być u pašparcie. Čaściej za ŭsio heta vakcyny ad čumy, panlejkapienii, adenavirusnaha hrypu — karaciej, virusnych chvarob. U Jeŭropie ich nie patrabujuć, a voś Biełaruś — tak. Heta ŭsie praviły».

Lubaja źmiena miesca žycharstva, pierajezd u transparcie — vialiki stres dla žyvioły, adznačaje Anton.

«Jość sposaby źmienšyć hety stres. Čaściej za ŭsio — heta prymianieńnie zaspakajalnych lekavych srodkaŭ. Zahadzia treba schadzić u vieterynarnuju apteku, skazać farmaceŭtu, što vy źbirajeciesia pierajazdžać, i vam vydaduć admysłovyja leki. Lepš pačać pryjom za paru dzion da vyjezdu, kab žyvioła trochi pryzvyčaiłasia, supakoiłasia. Viadoma, treba jašče maksimalna blizka być z samim hadavancam, staracca trymać jaho na rukach, razmaŭlać ź im. Treba, kab była znajomaja pieranoska, u jakoj jon pastajanna znachodzicca, kali kudyści jedzie z haspadarom, niejkija koŭdry, pledy, — usio pavinna być znajomaje, ničoha novaha. Heta standartnyja praviły, jakija dazvolać źmienšyć stres. Ale jany nie zaŭsiody dapamahajuć».

Taksama šmat ludziej turbujucca za svaich hadavancaŭ u vypadku pieralotaŭ na samalocie, bo ich mohuć adpravić u bahažny adździeł.

«Heta praviły, jakija abyści nijak nielha. U hetym vypadku možna znoŭ-taki vykarystoŭvać zaspakajalnyja preparaty, kab žyvioła mahła pieranieści hetuju pajezdku. Ale pieradusim udakładnicie ŭ toj avijakampanii, jakoj palacicie, praviły prajezdu hadavancaŭ, bo va ŭsich jany roznyja. I dzieści 8 kiłahramaŭ — heta dapuščalnaja vaha, kab uziać na bort samalota, a dzieści treba mienšaja. Varta ŭdakładniać, kab nie było niečakanaściaŭ».

«Sabačka ci kocik pavinny adčuvać abaronu»

Heta bazavyja rečy, jakija možna zrabić u idealnym varyjancie, kali jość mahčymaść padrychtavacca i spakojna pierajechać, kaža Anton. Ale va Ukrainie ciapier vajna, ludzi ŭ najmacniejšym stresie, adpaviedna, ciarpiać i ich hadavancy.

Pavialičyć

«Žyvioły absalutna ŭsio pierajmajuć ad haspadaroŭ. Im pastajanna davodzicca spuskacca ŭ prytułak ad bambiožak, heta mocna ŭpłyvaje. Naš kanał akurat zajmajecca dapamohaj u takich vypadkach. Ludzi źviartajucca, kažuć, naprykład, sabaka 3-4 dni nie jeŭ, tolki pje, vielmi mlavy. Čałaviek kaža nam pra niejkija simptomy, my razumiejem, što ničoha strašnaha nie adbyvajecca, heta nie chvaroba, heta stres, tamu supakojvajem. I kali čałaviek pierastanie pieražyvać, to i žyvioła taksama supakoicca».

Ciapier va Ukrainie amal niemahčyma kupić leki dla žyvioł, bo vieterynarnyja apteki nie pracujuć. Ale i tut Anton i Hanna časam mohuć dapamahčy.

«Va Ukrainie ciapier humanitarnaja katastrofa. Vieterynarnyja apteki začynienyja, zaakramy niejkija jašče pracujuć, ale tam nie zaŭsiody možna znajści niešta zaspakajalnaje. Tamu my starajemsia pracavać z tym, što jość. Raim dać hadavancu niejkija preparaty, jakija ludzi vykarystoŭvajuć, raźličvajem daziroŭku».

Taksama praz pastajanny stres žyvioła moža być uzbudžanaj ci, naadvarot, mlavaj.

«Sabačka ci kocik pavinny adčuvać abaronu. Tak, niešta adbyvajecca navokał, ale vy trymajecie jaho na rukach, i jon adčuvaje, što vy možacie jaho abaranić. Heta ŭ ich na ŭzroŭni instynktu, hadavaniec pavinien supakoicca.

Ciažka skazać, jak budzie siabie pavodzić hadavaniec, kali kožny dzień treba nieścisia na złom hałavy ŭ bambaschovišča. Tam i ludzi nie vytrymlivajuć. Ale kali ničoha niama zaspakajalnaha, to treba chacia b być ź im, nie kidać, trymać na rukach».

Kali vy zmahli vyjechać z zony bajavych dziejańniaŭ i ŭ vašaha hadavanca niama nijakich paškodžańniaŭ, to ŭsio adno jon budzie adčuvać vialiki stres. Žyvioła moža admaŭlacca ad kormu, być u pryhniečanym ci ŭzbudžanym stanie, kaža Anton.

«Tut dapamoža tolki čas. Ale voś rekamendacyja.

Ludzi pierajazdžajuć z hadavancami z zony bajavych dziejańniaŭ i, čaściej za ŭsio, mianiajuć im korm. Hetaha lepš nie rabić, bo heta dadatkovy stres. Varta ŭziać z saboj niejkuju kolkaść ježy, jakaja dla hadavanca zvykłaja.

Kali nijakich paškodžańniaŭ niama, to patrebny prosta čas. Haspadar supakoicca, tady i žyvioła supakoicca. Važna: zvykły korm, pastajannyja znosiny, prahułki, razmovy, i ŭsio pryjdzie ŭ normu. U niejkich ekstranych vypadkach adkryjecca niejkaja chvaroba na fonie stresu, tady možna źviarnucca da vieterynara. Kali ž čałavieka treba zaryjentavać, pierš čym iści da lekara, to možna źviartacca da nas».

Kali vy padabrali žyviołu z vulicy

Biez admysłovaj adukacyi budzie ciažka vyznačyć, chvoraja žyvioła ci nie.

«My raim źviarnucca da vieterynara. Heta možna zrabić pa miescy žycharstva, možna napisać nam, i my zaryjentujem. Čałaviek raskaža pra hadavanca, i doktar užo paraić, što treba rabić, a što nie, daść niejkija elemientarnyja rekamiendacyi, kštałtu — kupić šampuń ad błoch i pamyć sabaku, prybrać parazitaŭ, kupić preparaty ad hlistoŭ. Čaściej za ŭsio heta treba budzie rabić, kali sabaka dvarovy».

«Štodzień nam piša kala paŭsotni čałaviek»

Z pačatku vajny zvarotaŭ da Antona i Hanny stała ŭ niekalki razoŭ bolš, vyrasła aŭdytoryja kanała.

«Štodzień nam piša kala paŭsotni čałaviek. My pracujem non-stop. Ja ŭvieś u telefonie, pastajanna adkazvaju. Źviartajucca čaściej za ŭsio z adnymi i tymi ž pytańniami: jakija dakumenty treba mieć pry sabie na žyviołu, kab vyjechać u Polšču. U nas na kanale jość infarmacyja pra roznyja krainy. Nakont stanu žyvioły taksama ŭsio, u pryncypie, standartna: na fonie stresu idzie admova ad kormu, adkryvajucca chraničnyja chvaroby, kroŭ z nosu idzie ŭ sabaki, naprykład, bo pry stresie pavyšajecca cisk. Ludzi pytajucca ŭ nas, što rabić. Taksama dajom parady tym, chto pierajechaŭ, kali sabačka ci kocik nie pje, nie jeść».

Anton i Hanna kansultujuć ludziej biaspłatna, ale ich možna padtrymać tut

«U nas na kanale paznačanyja rekvizity, kali niechta zachoča nas finansava padtrymać, bo časta davodzicca achviaravać asnoŭnaj pracaj na karyść viadzieńnia kanała, dapamohi ludziam. Taksama možna pakinuć achviaravańnie na korm žyviołam. U nas jość infarmacyja na kanale ŭ zamacavanych paviedamleńniach. Kali źbirajecca niejkaja suma, my nabyvajem korm i adpraŭlajem va Ukrainu».

• 0
• 0
• 0
• 0
• 0
• 0
• 0
• 0