Washington Post: Zialenski paprasiŭ Bajdena pryznać Rasiju dziaržavaj — sponsaram teraryzmu
Washington Post śćviardžaje, što prezident Ukrainy Uładzimir Zialenski zaklikaŭ amierykanskaha prezidenta Džo Bajdena pryznać Rasieju dziaržavaj-sponsaram teraryzmu. Hazieta spasyłajecca na słovy nienazvanaha vysokapastaŭlenaha čynoŭnika, jaki prysutničaŭ padčas apošniaj telefonnaj razmovy Zialenskaha i Bajdena.
Padčas apošniaj telefonnaj razmovy prezidentaŭ Ukrainy i ZŠA, Zialenski aficyjna vykazaŭ prośbu, kab ułady ZŠA zakanadaŭča pryznali Rasiju dziaržavaj — sponsaram teraryzmu, što aŭtamatyčna ŭzmocnić sankcyjny i ekanamičny cisk na Kreml.
Bajden ničoha nie harantavaŭ i nie abiacaŭ źviarnucca da takoha kroku, ale zapeŭniŭ, što jon i tak razhladaje roznyja šlachi ŭzmacnieńnia cisku na Rasiju.
Taki krok, pa słovach byłoha čynoŭnika Dziarždepa Džejsana Błazakisa, možna mietafaryčna apisać jak «jadziernuju zbroju ŭ ekanomicy».
Źjaŭleńnie Rasii ŭ śpisie dziaržaŭ — sponsaraŭ teraryzmu aznačała b uviadzieńnie sankcyj suprać luboj krainy, jakaja budzie praciahvać vieści narmalnaje ekanamičnaje supracoŭnictva z Rasijaj, zamarožvańnie ŭsich aktyvaŭ Rasii na terytoryi ZŠA, razam z usioj nieruchomaściu, a taksama zabaronu na ekspart lubych tavaraŭ padvojnaha pryznačeńnia.
Ale ŭklučeńnie ŭ hety śpis — zusim vyklučnaja miera. Aŭtary artykuła adznačajuć, što amierykanskija ŭłady nie ŭnosili tudy, naprykład, SSSR navat u časy Chałodnaj vajny.
Zaraz u zhadany śpis uklučanyja čatyry krainy: Kuba, Paŭnočnaja Kareja, Iran i Siryja. Pa słovach ekśpiertaŭ, ź jakimi pahutaryli žurnalisty WP, krainy vyklučajucca z hetaha śpisu tolki paśla surjoznych źmienaŭ u palitycy ZŠA ci źmienie ŭ dziaržavie sa śpisu palityčnaha režymu, jak heta było ŭ vypadku Iraka ŭ 2004 hodzie.
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary