«1000 palitviaźniaŭ z 1200 pavinny vyjści na svabodu». Jeŭrapiejski dypłamat patłumačyŭ łohiku Zachadu ŭ adnosinach da Biełarusi
Čamu jeŭrapiejskija krainy nijak nie adreahavali na «rucinny» zvarot Uładzimira Makieja, jaki byŭ vysłany 6 krasavika? «Kali Łukašenka choča pierałamać niehatyŭnuju atmaśfieru ŭ Brusieli, jon pavinien zrabić vidavočny žest na adras ułasnaha hramadstva i apazicyi», — patłumačyŭ «Našaj Nivie» jeŭrapiejski dypłamat, jaki paprasiŭ zastacca ananimnym.
«Paśla vyzvaleńnia ŭsich ci bolšaści palitviaźniaŭ ź ciapierašnich 1200 viaźniaŭ Minsk zmoža absalutna abhruntavana čakać ad Brusiela nieŭklučeńnia Biełarusi ŭ čarhovyja pakiety sankcyj suprać Rasii», — kaža jeŭrapiejski dypłamat.
«Kali Łukašenka choča pierałamać niehatyŭnuju atmaśfieru ŭ Brusieli, rašuča nastrojenym na pašyreńnie sankcyj suprać Minska, jon pavinien zrabić vidavočny žest na adras ułasnaha hramadstva i apazicyi. Vidavočny — heta kali 100 pracentaŭ ci 80 pracentaŭ palitviaźniaŭ viartajucca dachaty. Palitviaźniaŭ ciapier amal 1200, minimum 1000 pavinny vyjści na svabodu», — tłumačyć dypłamat.
«Vyzvaleńnie viaźniaŭ nie pryviadzie da aŭtamatyčnaha źniaćcia sankcyj, ale pryviadzie da niepašyreńnia sankcyj», — patłumačyŭ jon.
«Inšy važny aśpiekt, — praciahvaje dypłamat, — kab paralelna ź Biełarusi byli vyviedzienyja rasijskija vajskoŭcy. Abo, jak minimum, kab z terytoryi Biełarusi nie ažyćciaŭlalisia ŭdary pa Ukrainie. Kali palitviaźni buduć vyzvalenyja, i rasijskija vojski ź Biełarusi buduć vyviedzienyja, i represii ŭ Biełarusi spyniacca, i adsutnaści inšych varožych dziejańniaŭ, ź jeŭrapiejskaha boku budzie zrobleny krok dva, jeŭrapiejskija krainy istotna asłabiać sankcyi», — kaža dypłamat.
«Poŭnaściu ž sankcyi z łukašenkaŭcaŭ buduć źniatyja tolki ŭ vypadku kali Alaksandr Łukašenka damovicca z hramadzianskaj supolnaściu krainy pra demakratyčnyja pieramieny ŭ krainy, kali hetuju damovu prymie hramadzianskaja supolnaść», — adznačaje dypłamat.
U hetym jon bačyć adroźnieńnie ad situacyi 2014 hoda, kali takoj umovy nie było.
«Usio prosta, — padsumoŭvaje dypłamat. — Treba spynić udzieł u vajnie, treba spynić pieraśled ludziej, treba dać ludziam svabodu i pačać demakratyčnyja pieramieny ŭ supracoŭnictvie z apazicyjaj tak, kab pry ŭsim pry hetym zabiaśpiečyć suvierenitet krainy. Voś adziny mahčymy ałharytm mirnych pieramien, jakich čakaje hramadstva krainy».
A jak u Jeŭropie staviacca da nastojlivych patrabavańniaŭ Minska i Maskvy, kab Biełaruś była dapuščanaja za stoł pieramovaŭ pra harantyi biaśpieki dla Ukrainy i Rasii?
«Kab ciabie razhladali jak partniora pa mirnych pieramovach, treba vałodać subjektnaściu, — kaža dypłamat. — Subjektnaść aznačaje suvierennaść. U hetym kanflikcie Łukašenka pavodziŭ siabie tak, niby Biełaruś — heta terytoryja Rasii. Druhoha hołasu Rasii (ci paŭhołasu) nam nie treba».
Kamientary