«Stolki dobrych słoŭ pra siabie pačuŭ, nie čakajučy niekrałoha». Eks-kiraŭnika «Achovy ptušak Baćkaŭščyny» pasadzili na 2,5 hoda
Siońnia vyniesieny prysud eks-kiraŭniku «Achovy ptušak Baćkaŭščyny». Viadomaha vučonaha-arnitołaha Viktara Fienčuka asudzili na 2,5 hoda kałonii. Jaho abvinavačvali pa č. 1 art. 342 KK (aktyŭny ŭdzieł u dziejańniach, jakija hruba parušajuć hramadski paradak). Pra heta paviedamiŭ «Zialony partał».
Zhodna z materyjałami spravy, «Fiančuk błakavaŭ ruch transpartu na prajeznaj častcy i vykrykvaŭ roznyja łozunhi».
— Stolki dobrych słoŭ pra siabie pačuŭ, nie čakajučy niekrałoha, — skazaŭ Viktar u apošnim słovie.
«Ni śviedki abvinavačvańnia, ni abarony nie mieli skazać suprać Viktara ničoha asudžalnaha, i prakurorka nie prydumała nivodnaha padstupnaha pytańnia. Jana naohuł u asnoŭnym złaviesna maŭčała», — apisała padziei na sudzie adna z prysutnych.
«Sudździa pytałasia ŭ śviedak, u čym zaklučałasia ekstremisckaja dziejnaść «APB». Śviedki nie zmahli adkazać, tamu što ŭ iskavych patrabavańniach spravy ab likvidacyi «APB» ekstremisckaja dziejnaść zaklučałasia tolki ŭ vychadach Viktara na akcyi pratestu.
— Ci prychodziŭ Fiančuk na pracu ŭ majkach z pratesnaj simvolikaj? — pytałasia prakurorka. — Ahitavaŭ jon da ŭdziełu ŭ pratestach? Ci braŭ Fiančuk z saboj na pratesty kvadrakoptary?
Akazałasia, nie braŭ i nie ahitavaŭ».
Śviedki zajaŭlali, što niezadoŭha da apisanych padziej «APB» prajšła pravierku Kiraŭnictva spravami prezidenta, danyja pravierki nakiroŭvali ŭ HUBAZiK i niametavaha raschodavańnia srodkaŭ (na ekstremisckuju dziejnaść) vyjaŭlena nie było.
U mabilnym telefonie Fienčuka vyjaŭlenyja paviedamleńni pradstaŭnikoŭ presy, pierapiska ź inšymi karystalnikami. Zaklučana, što Fiančuk padtrymlivaje adnosiny z šyrokim kołam asob, u pierapiscy abmiarkoŭvali padziei paśla žniŭnia 2020 hoda, paviedamlali ab zatrymańni znajomych.
Ale ŭ paviedamleńniach nie ŭtrymlivałasia zaklikaŭ da źviaržeńnia ŭłady ci źmieny palityčnaj situacyi ŭ RB na karyść apazicyi.
Minsktrans zajaviŭ pra nibyta naniesienuju škodu ŭ pamiery 196 tysiač 319 rubloŭ 74 kapiejek.
«Prysutnyja byli vidavočna ŭzrušanyja razburalnaj siłaj adnaho asobna ŭziataha Viktara», — apisvaje padziei na sudzie adna z prysutnych tam.
Prakuror iskavyja patrabavańni padtrymała, ale nie zmahła ŭciamna rastłumačyć raźliki.
Advakatka prasiła sud Fienčuka apraŭdać.
«Sam fakt udziełu ŭ masavym mierapryjemstvie, — kazała advakat, — nie ciahnie za saboj adkaznaści pa častcy 1 artykuła 342. Artykuły 33 i 35 Kanstytucyi harantujuć svabodu mierkavańnia i mirnych schodaŭ. Hetaje prava nie moža być abmiežavanaje navat biez atrymańnia sankcyi ad harvykankama. Dy i fakt vykazvańnia mierkavańnia pa hramadska-palityčnych pytańniach nie ciahnie adkaznaści pa č. 1 art. 342.
Ale sud padtrymaŭ abvinavačvańnie.
Isk Minsktransa ŭ pamiery 196 tysiač 319 rubloŭ i 74 kapiejek sud vyłučyŭ u asobnuju vytvorčaść.
Fiančuk svajoj viny nie pryznaŭ. Ën pryznaŭ, što braŭ udzieł u maršach, ale ličyć heta svaim zakonnym pravam hramadzianina.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary