Na niadaŭniaj naradzie pa sacyjalna-ekanamičnych pytańniach Alaksandr Łukašenka aburyŭsia cenami na aŭtamabili Geely. Užo na nastupny dzień ceny «adkrucili». Paraŭnali, kolki Geely kaštavali da raznosu ad Łukašenki, a kolki ciapier.
Pa toje, što cana na mašyny ŭpała na 15%, dziaržaŭnyja kanały paviedamili ŭčora.
Kali my ŭviečary patelefanavali ŭ adzin z centraŭ prodažaŭ, tam, padobna, byli razhublenyja. Na pytańnie pra canu nie viedali, što adkazać, i prasili pavisieć na provadzie.
Ceny na sajtach pamianiali tolki siońnia.
«Śpiecyjalnaja prapanova na ŭvieś madelny šerah», — anansujuć dylerskija centry.
Treba skazać, što biełaruska-kitajskija aŭtamabili marki Geely pieršapačatkova nie źjaŭlajucca tannym tavaram, prynamsi, tyja madeli, što jość na biahučy momant u prodažy. Na vybar prapanujuć try parkietniki.
Samy tanny ź ich — Coolray. Da niadaŭniaha času ceny na jaho pačynalisia z adznaki 74300 rubloŭ (kala 28575$). Paśla anansavanaha patańnieńnia Coolray kaštuje ad 62815 rubloŭ (kala 24150$). Jak bačym, aŭtamabil skinuŭ u canie adrazu 15,4%.
Nastupnym idzie Geely Atlas Pro, da narady jaho pradavali pa canie ad 87400 rubloŭ (kala 33600$). Ciapier pazadarožnik u samaj prostaj kamplektacyi kaštuje 74950 rubloŭ (kala 28800$). Heta taksama minus 15,4% ad papiaredniaj cany.
Samaja darahaja z madelaŭ Geely, jakija jość u prodažy ŭ Biełarusi, — Tugella. Raniej jana była dastupnaja pa cenach ad 108800 rubloŭ (kala 41850$). Z dyskontam pradajuć pa 92140 rubloŭ (kala 34400$).
Adnak dyskont nie admianiaje taho, što ceny na biełaruska-kitajskija aŭto ŭsio adno dalokija ad «narodnych». Bo samaja tannaja ź ich kaštuje ad 24 tysiačy dalaraŭ.
Čytajcie taksama:
«Ceny vyraśli na 30—50%, novyja mašyny praktyčna nie pastaŭlajuć». Što adbyvajecca na aŭtarynku
Biełarusy zastanucca biez novych Volkswagen?
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary