U Minsku daktary praviali ŭnikalnuju apieracyju nienarodžanaj dziaŭčyncy
Pieršuju ŭ Biełarusi ŭnutryŭłonnuju apieracyju dziciaci z hienietyčnaj patałohijaj pazvanočnika praviali sumiesna doktar-niejrachirurh, zahadčyk niejrachirurhičnaha adździaleńnia RNPC nieŭrałohii i niejrachirurhii Michaił Tałabajeŭ i śpiecyjalisty RNPC «Maci i dzicia». Ciapier maleńkaj Hannačcy ŭžo čatyry miesiacy. Ab niezvyčajnym vypadku raspavioŭ telekanał STB.
U siamji Maryny i Mikałaja Hannačka — pieršaje i doŭhačakanaje dzicia.
U siaredzinie ciažarnaści vyśvietliłasia, što ŭ małoj hienietyčnaja patałohija chrybietnika. Marynie skazali, što dzicia albo budzie invalidam, albo nie narodzicca zusim. Im prapanavali pierapynić ciažarnaść, ale jany admovilisia. Krychu paźniej baćkam raspaviali, što dziciaci možna zrabić ŭnutryŭłonnuju apieracyju. I papiaredzili, što raniej u Biełarusi padobnych jašče nie rabili.
I 15 śniežnia 2021 hoda ŭ našaj krainie praviali takuju pieršuju karekcyju pryrodžanaj zahany raźvićcia centralnaj niervovaj sistemy.
— Padčas apieracyi my zabiaśpiečvali z dapamohaj śpiecyjalnaha abstalavańnia pastajannaje ŭviadzieńnie padahretych rastvoraŭ, jakija praktyčna adpaviadajuć kalapłodnym vodam. Dziakujučy hetamu dzicia znachodziłasia va ŭłońni matki — u kamfortnych umovach, — raspavioŭ zahadčyk adździaleńnia aniestezijałohii i reanimacyi RNPC «Maci i dzicia» Alaksandr Bahamołaŭ.
Ania naradziłasia na 33-m tydni i jašče dva miesiacy praviała razam z maci ŭ balničnych pałatach. Praapieravanaje miesca na śpincy dziciaci daktary časova zakryli štučnaj skuraj, kab kali dziaŭčynka adužeje, pravieści jašče adnu apieracyju. Toje, što adbyłosia dalej, ździviła navat daktaroŭ — rana zaciahnułasia samastojna, a štučny materyjał adpaŭ.
Ciapier čytajuć
Statkievič raskazaŭ, jak vyžyvaŭ u źniavoleńni. I čym zajmajecca ciapier1
Kamientary