«Heta pierš za ŭsio niebiaśpiečna dla biełaruskaha naroda». Zialenski adreahavaŭ na zajavy Łukašenki
Prezident Ukrainy Uładzimir Zialenski prakamientavaŭ siońniašniuju zajavu Alaksandra Łukašenka pra toje, što jon zaŭsiody budzie z «brackaj Rasijaj», a ŭdzieł u vajnie im daŭno vyznačany.
«Heta pierš za ŭsio niebiaśpiečna dla družalubnaha biełaruskaha naroda, dla našych susiedziaŭ u Biełarusi, toje, što jon (Łukašenka. — NN) robić. Jon pavinien, mnie zdajecca, nie ŭciahvać Biełaruś u zachopnickuju vajnu Rasii suprać Ukrainy i parušeńnie ŭsich mižnarodnych damovaŭ, mižnarodnaha prava ŭ cełym. Mnie zdajecca, niebiaśpiečnym hučyć toj sihnał, jaki byŭ, ja dumaju, što my ŭbačym z vami vyniki hetych sihnałaŭ», — prakamientavaŭ Zialenski padčas bryfinhu z premjer-ministram Aŭstralii Entani Ałbienizi zajavy Łukašenki.
«Ja dumaju, nie sakret ni dla kaho, što z terytoryi Biełarusi byli vypuščanyja rakiety pa našaj dziaržavie. Nakolki mnie viadoma, Łukašenka tym ci inšym čynam davaŭ sihnały, što bieź jaho voli byli vypuščanyja tyja ci inšyja rakiety», — adznačyŭ Zialenski.
Nahadajem, Łukašenka padčas cyrymonii ŭskładańnia viankoŭ na «Kurhanie Słavy» 3 lipienia vystupiŭ z zajavami pra vajnu:
«Nas siońnia paprakajuć, što my adzinaja kraina ŭ śviecie, jakaja padtrymlivaje Rasiju ŭ jaje baraćbie suprać nacyzmu. My padtrymlivali i budziem padtrymlivać Rasiju».
«I što jany nie viedali, što ŭ nas stvoranaja ŭžo daŭno ŭ sajuzie Biełarusi i Rasii adzinaja hrupoŭka ŭzbrojenych sił, faktyčna adzinaje vojska. Vy ž heta viedali. Dyk čamu nas siońnia paprakajecie? My byli i budziem z brackaj Rasijaj.
Naš udzieł u hetaj śpiecapieracyi (vajnie.— NN) mnoju vyznačany daŭno. U pieršy dzień pačatku hetaj apieracyi. Kali ja skazaŭ, uspomnicie: «My nikomu nie dazvolim stralać u śpinu ruskamu čałavieku».
I my zaniali abaronu ad Bresckaj krepaści pa paŭdniovaj miažy, kab nie dapuścić hetaha ŭdaru ŭ śpinu z boku nataŭskich vojskaŭ. Jany hetaha nam daravać nie mohuć», — zajaviŭ Łukašenka.
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1212
Kamientary