Tenisistka Sierena Uiljams pakryŭdziłasia na arhanizataraŭ Uimbłdona, bo joj nie dali piać mašyn
Zornaja tenisistka Sierena Uiljams prapuściła śviatkavańnie stahodździa centralnaha korta Uimbłdona, bo pakryŭdziłasia na arhanizataraŭ turniru. Spartsmienka była niezadavolenaja tym, što jany nie pradastavili joj piać aŭtamabilaŭ na čas mierapryjemstva.
U hetym hodzie centralny kort Uimbłdona adśviatkavaŭ svajo stahodździe. Na cyrymoniju pryjechali tenisnyja zorki, u tym liku Rodžer Fiederer, Bili Džyn Kinh i Rafael Nadal, piša The Telegraph.
Čakali tam i 23-kratnuju pieramožcu turniraŭ Vialikaha Šlema Sierenu Uiljams, jakaja ŭ hetym hodzie vybyła z Uimbłdona ŭžo ŭ pieršym raŭndzie, kali prajhrała francužancy Charmani Ten 5:7, 6:1, 6:7 (7:10). Ale Uiljams nie źjaviłasia na śviacie.
Anhlijskija žurnalisty śćviardžajuć, što tenisistka prapuściła mierapryjemstva, bo joj nie pradastavili na čas turniru piać aŭtamabilaŭ. Jana žadała atrymać mašynu nie tolki dla siabie, ale i dla muža, maci, siastry i treniera. Miž tym, astatnija tenisisty ŭ asnoŭnym karystajucca na turniry tolki adnoj mašynaj ci ŭ redkich vypadkach dźviuma.
Uiljams taksama žadała vykarystoŭvać mašynu na praciahu ŭsiaho turniru, jaki doŭžycca dva tydni. Takaja praktyka nasamreč isnuje na inšych turnirach Vialikaha Šlema, naprykład, na Rałan-Harosie. Ale arhanizatary adkazali Uiljams, što heta niemahčyma, bo inšym tenisistam, jakija hulajuć u Łondanie, taksama treba aŭtamabili.
Miedyja śćviardžajuć, što Uiljams była niezadavolenaja hetaj situacyjaj i tamu admoviłasia ad udziełu ŭ śviatočnaj cyrymonii. Arhanizatary śviata paviedamili žurnalistam, što tenisistka viarnułasia dachaty, u ZŠA.
Kamientary