«Spačatku prapanoŭvali «pierasiadzieć», a ciapier treba zvalniacca». Padrabiaznaści začystki ŭ «Łade» raskazvajuć daktary
«Naša Niva» pahavaryła z supracoŭnikami miedcentra «Łade», dzie apošnim časam iduć zvalnieńni «niełajalnych» daktaroŭ.
Voś što raskazvajuć ludzi:
«Vykliki na razmovu da načalstva pačalisia jašče tydni try tamu. Kahości zaprašajuć u adździeł kadraŭ, kahości — da zahadčyka ci dyrektara albo da jaho namieśnikaŭ. Tam miedykam paviedamlajuć: «My musim z vami spynić supracoŭnictva. Vy ŭ śpisach».
Pa čutkach, u hetych śpisach 13 čałaviek.
Vyhladaje, što zvalnieńni — inicyjatyva nie kiraŭnictva «Łade». Načalstva sprabavała zachavać ludziej, niekatorym spačatku prapanavali schadzić u adpačynak, «pierasiadzieć». Ale paśla «niapravilnym» miedykam ŭsio roŭna paviedamili: usio ž vam pryjdziecca zvolnicca».
Zvalniacca ludziam prapanujuć pa pahadnieńni bakoŭ. Adkul śpisy, dakładnaj infarmacyi niama.
«Chtości kaža, što spuščanyja Minzdaroŭja. Viadoma, što načalstva kamuści tłumačyła: śpisy ź niejkaj asablivaj ustanovy, ź jakoj — skazać vam my nie možam.
Daktaram načalniki kažuć prykładna tak: «Heta palityčnyja śpisy, vy ž darosłyja ludzi, sami usio razumiejecie. Nas vy zadavalniajecie, ale nam rekamiendujuć z vami nie supracoŭničać», — raskazvajuć «Našaj Nivie».
Kiraŭnictva miedcentra prapanuje miedykam sa śpisaŭ uziać ich na paruki albo napisać pakajalny list ci zapisać pakajalnaje videa. Kudy buduć pieradavacca hetyja listy ci videa, dzie jany buduć publikavacca, daktaram nie kažuć. Pakul nieviadoma pra vypadki, kab chtości pahadziŭsia kajacca.
«Što jany majuć na ŭvazie pad farmuloŭkaj «uziać na paruki», nie viedaju. Ale adnamu ź miedykaŭ kiraŭnictva «Łade» prapanoŭvała napisać list, dzie miedyk musić paabiacać, što nie budzie ŭdzielničać u pratestach.
Zvalniacca pahadžajucca nie ŭsie. Viedaju, što adnamu doktaru, jaki nie zachacieŭ, pačali admianiać pryjom pacyjentaŭ na nastupny miesiac. Načalstva jaho raspytvała: «Čamu nie chočacie zvalniacca? My vas nie razumiejem jak čałavieka. Admovaj zvolnicca vy padstaŭlajecie ŭvieś kalektyŭ miedcentra!»
Načalniki nie pahražajuć tym, chto nie choča zvalniacca, chutčej uhavorvajuć syści «pa-dobramu». Ale kažuć: vy bolš nidzie pracavać nie zmožacie.
Moža heta nie pahroza, a budučaja realnaść?» — zadajecca pytańniem miedyk.
Tym, chto ŭparta supraciŭlajecca zvalniacca pa pahadnieńni bakoŭ, kažuć naŭprost: budziem vymušanyja šukać artykuł, kab vas zvolnić.
«Z rabotnikami pra zvalnieńni razmaŭlaje «staroje» načalstva. Ale chodziać čutki, što pryznačany niejki novy namieśnik, były padpałkoŭnik, jaki budzie «pryhladvać».
Ja jaho nie bačyŭ, imia nie viedaju, tamu paćvierdzić, što heta dakładna praŭda, nie mahu», — dzielacca daktary.
Kamientary