Za maskvičami sočać adrazu čatyry ałharytmy raspaznavańnia asob. Adzin ź ich — skandalna viadomy biełaruski
Ułady Maskvy sočać za žycharami z dapamohaj adrazu čatyroch technałohij raspaznańnia tvaraŭ — jany pracujuć adnačasova i kankurujuć adna z adnoj, daviedałasia Ruskaja słužba «Bi-Bi-Si».
Maskoŭskaja sistema videanazirańnia vykarystoŭvaje ałharytmy NtechLab, Tevian FaceSDK, VisionLabs Luna Platform i Kipod — toj, što dapamahaje biełaruskim siłavikam. Razam jany ŭmiejuć raspaznavać nie tolki tvary, ale navat emocyi ludziej.
Heta stała viadoma z tenderaŭ. AT «Elektronnaja Maskva» u siaredzinie leta raźmiaściła čatyry kantrakty na pasłuhi pa techpadtrymcy sistemy videaanalityki. Za dva hady čynoŭniki chočuć vydzielić na jaje absłuhoŭvańnie kala 800 młn. rasijskich rubloŭ.
Biełaruski ałharytm
Kipod — raspracoŭka rasijska-biełaruskaj kampanii «Sinezis». Jaje karani — u minskim parku vysokich technałohij. Krychu paźniej źjaviŭsia i ofis u padmaskoŭnym «Skołkava».
Pieršapačatkova kampanija zajmałasia raspracoŭkami prahramnaha zabieśpiačeńnia na zamovu, ale potym stała rabić ułasnyja pradukty. Sistema intelektualnaha videanazirańnia Kipod — adzin ź ich.
Mienavita Kipod staŭ asnoŭnaj technałohijaj raspaznańnia tvaraŭ, jakaja była ŭkaranionaja biełaruskimi ŭładami ŭ krainie i dapamahała miascovymi siłavikam znachodzić tych, chto ŭdzielničaŭ u akcyjach pratestu suprać falsifikacyi vybaraŭ u Minsku ŭ 2020 hodzie. U vyniku i «Sinezis», i adzin z zasnavalnikaŭ kampanii Alaksandr Šatroŭ trapili pad sankcyi ES i ZŠA — za pradastaŭleńnie biełaruskim uładam płatformy dla sačeńnia i identyfikacyi praciŭnikaŭ režymu, vynikaje z aficyjnych dakumientaŭ ES.
Na svaim sajcie «Sinezis» paćviardžaje, što mienavita Kipod pracuje na stancyjach maskoŭskaha mietrapalitena. Akramia pošuku pa fatahrafii, jana, pa śćviardžeńni raspracoŭščykaŭ, moža znajści čałavieka pa prykmietach — treba ŭkazać jaho prykładny ŭzrost, poł, rasu, ci nosić jon akulary, baradu ci vusy.
Z dapamohaj kamier, padklučanych da Kipod, biełaruskija siłaviki, naprykład, nibyta zmahli vysačyć i zatrymać apazicyjnaha błohiera Mikałaja Dziadka, paviedamlaŭ prajekt ByPOL (abjadnoŭvaje byłych supracoŭnikaŭ pravaachoŭnych orhanaŭ Biełarusi).
U lutym 2022 hoda ByPOL vypuściŭ videarasśledavańnie, pryśviečanaje Kipod. U im, u pryvatnaści, apublikavany aŭdyjozapis telefonnaj razmovy pamiž, jak śćviardžaje ByPOL, dvuma vysokapastaŭlenymi biełaruskimi siłavikami.
«Tam pa pracentnych suadnosinach možna šukać supadzieńni. 100% uvohule redka kali vydaje niešta, zvyčajna ad 50% da 80% pracujem, a kali nižej źnižaješ, ich vielmi šmat, i treba ŭ ručnym režymie adhladać […]. Kali u Kipod vydaje «supad», jano pakazvaje kavałačak videa. Jaho naciskaješ, adčyniaješ — i možna pahladzieć frahmient zapisu mietro pierachodu peŭnaha čałavieka, na kaho «supad» daje, jak jon vyhladaje», — dzielicca adzin ź ich dośviedam pracy z ałharytmam.
U samoj kampanii paśla ŭskosna paćvierdzili sapraŭdnaść razmovy, adznačyŭšy, što havorka idzie pra pošuk złačynca, jaki napaŭ u Minsku z nažom na žančynu.
U «Sinezisie» naohuł kamientujuć kožnuju publikacyju ab pracy Kipod u Biełarusi, aktyŭna vykarystoŭvajučy takija słovy, jak «fejk» i «postpraŭda», a rašeńnie ES ab uvodzie sankcyj asprečyli ŭ sudzie.
«Masava vyznačać udzielnikaŭ pratestaŭ dazvalaje mabilnaja suviaź, sacsietki, fota ŭ ŚMI. Kipod pabudavany na absalutna inšaj łohicy i pryznačany dla pošuku zaviedama identyfikavanych ludziej — ludziej u vyšuku, źnikłych bieź viestak i h.d. Fejk zasnavany na technałahičnych fobijach hramadzian i bytavoj łohicy», — tak, naprykład, tam kamientujuć abvinavačańni ŭ tym, što ałharytm raspaznańnia tvaraŭ ad «Sinezis» vykarystoŭvaŭsia dla pošuku biełaruskich apazicyjanieraŭ.
Aŭkcyjon ałharytmaŭ
Usie čatyry ałharytmy zadziejničanyja meryjaj adnačasova, raspaviali «Bi-bi-si» ŭ departamiencie infarmacyjnych technałohij Maskvy.
«Jakoha-niebudź raźmierkavańnia videapatokaŭ pamiž ałharytmami niama. Videapatoki z kamier adnačasova apracoŭvajucca ŭsimi čatyrma ałharytmami. Dalej pa śpiecyjalnaj formule vyličvajecca vynik pracy ŭsich ałharytmaŭ u sukupnaści», — zajavili ŭ viedamstvie.
Taki padychod dazvalaje «abjadnać mocnyja baki kožnaha raspracoŭščyka» i pavysić «dakładnaść raspaznańnia», hanaracca ŭ meryi.
Ciapier čytajuć
Połk Kalinoŭskaha paviedamiŭ pra hibiel troch bajcoŭ4
Kamientary