Kampanija, źviazanaja z Šejmanam i Zinhmanam, trapiła ŭ novy skandał z zołatam u Zimbabve
Zołatazdabyŭnuju kampaniju Zim Goldfields abvinavacili ŭ nielehalnaj zdabyčy zołata i inšych karysnych vykapniaŭ na terytoryi viadomaha turystyčnaha kompleksu Mjuzienhana Łodž (Musangano Lodge), piša Reform.by sa spasyłkaj na zimbabvijskaje vydańnie The Standard.
Kompleks naležyć hramadziancy Hiermanii Birhit Klajn Alterkamp (Birgit Klein Alterkamp) i jaje ŭłasnaść abaroniena dvuchbakovym pahadnieńniem ab abaronie i zaachvočvańni inviestycyj (BIPPA).
Biełaruskuju kampaniju Zim GoldFields (ZGF) i kitajskuju Young Tech Engineering (YTE) abvinavačvajuć u raspracoŭcy karysnych vykapniaŭ, u tym liku rassypnoha zołata pobač z turystyčnym kompleksam. Paśla hetaha jany pieranieśli raspracoŭku i na ziamlu, jakaja naležyć niamieckaj hramadziancy. Śćviardžajecca, što heta niehatyŭna paŭpłyvała na turystyčny biznes.
Alterkamp źviarnułasia ŭ Viarchoŭny sud, jaki zabaraniŭ praciahvać zdabyču karysnych vykapniaŭ, adnak ZGF i YTE abskardzili hetaje rašeńnie i praciahnuli raboty.
«U adnym ź listoŭ ZGF i YTE zajavili, što my vusna dali im dazvoł na zdabyču karysnych vykapniaŭ na našaj terytoryi, što źjaŭlajecca chłuśnioj, i my zajavili, što acenka ŭździejańnia na navakolnaje asiarodździe nie pravodziłasia, što źjaŭlajecca patrabavańniem zakanadaŭstva Zimbabve. ZGF i YTE adkazali, što im nie patrebna takaja acenka», — skazała ŭładalnica turystyčnaha kompleksu.
Pa słovach Alterkamp, 8 lipienia 2022 hoda kampanii pačali zdabyču karysnych vykapniaŭ na terytoryi, prylehłaj da turystyčnaha kompleksu z vykarystańniem ciažkaj techniki.
«Šum, jaki vyrablajecca hetaj ciažkaj technikaj, niepakoiŭ haściej Musangano Lodge», — zajaviła jana.
Alterkamp źviarnułasia ŭ sud i 1 vieraśnia Viarchoŭny sud Mutary vydaŭ časovuju zabaronu, jakaja pradpisvała spynić zdabyču. Biełaruskija i kitajskija zołatazdabytčyki apratestavali zabaronu i, nie čakajučy rašeńnia, 6 vieraśnia z padvojenaj siłaj prystupili da rabot, kab paśpieć zdabyć maksimalnuju kolkaść zołata.
Pryvatnaja kampanija Zim Goldfields Pvt Ltd nie ŭpieršyniu traplaje ŭ skandał. U listapadzie 2020 hoda minimum dva harniaki zahinuli ŭ šachcie pa zdabyčy zołata na radoviščy, jakoje naležyć Zim Goldfields.
U kastryčniku 2021 hoda biełaruskija rasśledavalniki atrymali dostup da archiva dakumientaŭ z Pandora Papers i vyśvietlili, što ŭ krasaviku 2018 hoda było zasnavanaje sumiesnaje pradpryjemstva pa zdabyčy zołata Zim Goldfields Pvt Ltd, dzie praź niekalki prakładak Siarhiej Šejman i Alaksandr Zinhman atrymali 70%. U mai 2018 hoda Zim Goldfields Pvt Ltd atrymała hrant na pošuk i zdabyču zołata.
-
Bienhalskija ahni na šampanskim stali pryčynaj pažaru ŭ bary ŭ Šviejcaryi, dzie zahinuli 40 čałaviek
-
Kirujučaja partyja Hiermanii choča vysyłać siryjcaŭ, jakija biehli ad hramadzianskaj vajny, nazad na radzimu — navat rehularnymi rejsami
-
Jeŭrakamisija pačała rasśledavańnie z-za tyktokaŭ, stvoranych z dapamohaj štučnaha intelektu, jakija zaklikajuć da vychadu Polščy ź ES
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»3
Kamientary