Bolš nie IBA Group. Jak kampanii ścirajuć Biełaruś sa svajoj historyi i brenda
Paśla 24 lutaha zachodnija zakazčyki časta admaŭlajucca pracavać z padradčykami ź Biełarusi i Rasii. Niekatoryja kampanii prymajuć miery ŭ adkaz — prosiać svaich supracoŭnikaŭ chavać biełaruskuju łakacyju ŭ LinkedIn i karystacca VPN padčas pracy. Niamała kampanij iduć jašče dalej i imknucca schavać usialakuju suviaź ź Biełaruśsiu, choć i praciahvajuć pracavać u krainie, piša dev.by.
Restrukturyzacyja i rebrendynh IBA i Adani
Jak minimum dźvie viadomyja kampanii restrukturavali i/abo pierajmienavali svaje biznesy ŭ Biełarusi: aŭtsors-raspracoŭščyk IBA Group (štat u 2021 hodzie — 2380 čałaviek) i vytvorca miedycynskaj techniki i sistem biaśpieki Adani (štat u Biełarusi — 500+ čałaviek).
Abiedźvie kampanii davoli aktyŭna supracoŭničali ź dziaržaŭnymi orhanami i pradpryjemstvami Biełarusi. Alaksandr Łukašenka daručaŭ dyrektaru Adani Uładzimiru Liniovu «ŭziać na kantrol zabieśpiačeńnie aparatami miedustanoŭ», a IBA Group vykonvaje dziaržzakazy dla padatkovaj i raspracoŭvaje prahramy dla haradskoha transpartu.
Ciapier adno z padraździaleńniaŭ IBA u Biełarusi nazyvajecca «Mižnarodny dziełavy aljans». Pry hetym sajt kampanii zastaŭsia pa raniejšym adrasie — iba.by. Napisana, što «aljans» — heta «hrupa IT-kampanij, u jakuju ŭvachodziać kampanii ź Biełarusi i Rasii».
Miarkujučy pa infarmacyi ź JEHR, jurydyčnaja asoba «Mižnarodny dziełavy aljans» isnuje z 2001 hoda. Raniej takuju nazvu nasiŭ mahiloŭski filijał IBA Group.
«Mižnarodny dziełavy aljans» uvajšoŭ u PVT u biahučym hodzie.
Na hłabalnym sajcie IBA Group niama ofisaŭ u Biełarusi i Rasii.
Pres-słužba «Mižnarodnaha dziełavoha aljansu» paćvierdziła dev.by, što IBA Group vyjšła sa składu zasnavalnikaŭ kampanii ŭ 2022 hodzie.
«Tak, z 2022 hoda IBA Group vyjšła sa składu zasnavalnikaŭ MDA, ale heta nijak nie ŭpłyvaje ni na biahučyja abaviazacielstvy pierad našymi klijentami i supracoŭnikami, ni na płany pa raźvićci. Asnoŭny napramak našaha biznesu byŭ i zastajecca niaźmiennym: pradastaŭleńnie hatovych rašeńniaŭ i zakaznaja raspracoŭka prahramnaha zabieśpiačeńnia dla klijentaŭ ź Biełarusi. U vieraśni 2022 hoda kampanija «Mižnarodny dziełavy aljans» atrymała status rezidenta PVT, kab vykarystoŭvać śpiecyjalny pravavy režym dla pašyreńnia mahčymaściej dla biźniesu. Akramia taho, u nas jość płany pa pašyreńni štatu IT-śpiecyjalistaŭ, u tym liku za košt vypusknikoŭ profilnych navučalnych ustanoŭ».— dała kamientaryj dev.by pres-słužba kampanii.
Pry hetym u vypiskach jašče dvuch afilavanych jurydyčnych asob — zamiežnaha pradpryjemstva «AjBiEj AjTi Park» i TAA «IVA-Homiel-Park» (rezidenty PVT) — niama śviežych źmianieńniaŭ u 2022 hodzie.
Tym časam Adani mianiaje ŭžo treciuju nazvu za apošnija dva hady.
Pieršapačatkova kampanija Liniova ŭ Biełarusi nazyvałasia ZAT «Adani Technoładžys». U 2021 hodzie nazvu pamianiali — na ZAT «Daśledčy i inavacyjny centr Liniova». Na mižnarodnym rynku jana stała zvacca Linev Group. Ale prachodzić hod — i nazvu znoŭ mianiajuć. Ciapier na zachodnim rynku pradpryjemstva nazyvajecca Linev Systems, a na rynku Rasii i Biełarusi — «Advin».
Ahulnuju błytaninu padkreślivaje toj fakt, što ŭ kampanii try sajty: adanisystems.com (na samim sajcie kampanija nazyvajecca Linev Systems), linevgroup.com i advin.by. Pryčym na apošnim niama adrasa biełaruskaha ofisa, a tolki adras rasijskaha.
Drennaja reputacyja damiena by
Najbolš raspaŭsiudžany sposab schavać suviaź z krainaj — vydalić infarmacyju pra biełaruskija ofisy z aficyjnaha sajta kampanii i pierajechać na mižnarodny damien.
EPAM i Wargaming vydalili biełaruskija staronki sa svaich sajtaŭ u pieršyja tydni paśla pačatku vajny. Ciapier staronka epam.by aŭtamatyčna pieraadrasoŭvaje karystalnika na epam.com.
Ruskamoŭny sajt najstarejšaj IT-kampanii Biełarusi ScienceSoft (štat u Biełarusi ŭ 2021 hodzie — 620 čałaviek) ciapier nazyvajecca scnsoft.team — na jaho aŭtamatyčna pieranakiroŭvaje stary sajt scnsoft.by. Na hłabalnym sajcie — scnsoft.com — ofisy ŭ Biełarusi nie zhadvajucca (u Jeŭropie kampanija pracuje jašče ŭ Łatvii, Finlandyi i Hruzii).
Bolš niama sajta vrpconsulting.by, chacia na aficyjnaj staroncy VRP (štat u 2021 hodzie — 620 čałaviek) u fejsbuku taki sajt dahetul značycca. Ruskamoŭnaja staronka ŭ fejsbuku kampanii nie abnaŭlajecca z 22 lutaha. Na hłabalnym sajcie kampanii ofisy ŭ Biełarusi nie zhadvajucca.
Biełaruski sajt Softeq Development (štat u 2021 hodzie — 280 čałaviek) — softeq.by — ciapier viadzie na hłabalny sajt z vakansijami kampanii (u Biełarusi vakansij niama).
Na sajtach bujnych kampanij Andersen, Innowise Group, Qulix biełaruskich łakacyj bolš niama.
Vidać, «padčyściŭ» biełaruski śled i raspracoŭščyk sistem videanazirańnia Synesis (znachodzicca pad sankcyjami ES). U sakaviku kampanija vydaliła z sajta ŭsie ŭłasnyja «abviaržeńni» pra Kipod i sankcyi. Ciapier na sajtach synesis-group.com i synesis.ru kampanija pazicyjanujecca jak rasijskaja, z adzinym ofisam i vakansijami ŭ Maskvie. Na sajcie synesis.by niama nijakaj infarmacyi pra ofisy ŭ Biełarusi, tolki sastarełyja naviny. Kali mienavita «biełaruskaja» infarmacyja źnikła, nieviadoma.
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata16
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1313
Kamientary