Ministr ekanomiki: Pramyja straty Biełarusi ad spynieńnia pastavak u Jeŭropu — 6 miljardaŭ dalaraŭ, ale ničoha strašnaha niama
Na sustrečy z pracoŭnymi kalektyvami, kab padymać im upeŭnienaść u zaŭtrašnim dni, akramia siłavikoŭ jeździać i cyvilnyja vysokija čynoŭniki. Tak, siońnia pierad rabotnikami AAT «Naftan» i aktyvam Navapołacka vystupiŭ Ministr ekanomiki Biełarusi Alaksandr Čarviakoŭ, jaki paviedamiŭ, što tolki pramyja straty Biełarusi ad spynieńnia pastavak u Jeŭropu skłali vializnuju sumu — 6 miljardaŭ dalaraŭ. Ale heta, pa jaho słovach, nie biada.
Ministr paviedamiŭ, što pradukcyi na 5 miljardaŭ dalaraŭ, amal 80 % stračanaha ŭ Jeŭropie, užo znajšłosia miesca ŭ Rasii i Kitai. A z sychodam brendavych kampanij z Rasii tam źjavilisia nišy dla našych vytvorcaŭ, jakija možna zaniać.
Uvohule ŭ biełarusaŭ, pavodle Čarviakova, usio cudoŭna ŭ paraŭnańni ź Jeŭropaj: tut niama enierhietyčnaha kryzisu, pavyšajucca sacyjalnyja vypłaty, zarpłaty i piensii. A heta mahčyma, jak padkreśliŭ jon, tolki tady, kali ekanomika pracuje stabilna.
Tamu mienavita destabilizacyja ekanomiki Biełarusi źjaŭlajecca adnoj sa stratehičnych zadač «kalektyŭnaha Zachadu», adznačyŭ nie tolki Čarviakoŭ, ale i inšyja vystupoŭcy. Tolki heta ŭsio asudžana na parazu, bo ŭnutranych prablem u sistemie nijakich niama. Kali i jość zapavoleńni ŭ niekatorych napramkach ekanomiki, to jany abumoŭleny tolki štučna stvoranymi barjerami zvonku, jak, naprykład, u drevaapracoŭčaj pramysłovaści. A ŭnutry ŭsio zbudavana dobra.
Zatoje ŭ Jeŭropie z-za niepradbačliva ŭviedzienych joj ža sankcyj suprać Rasii i Biełarusi stabilna daražeje charčovy košyk. U toj čas jak Biełaruś sioleta sabrała «rekordny ŭradžaj», jaki dazvolić joj zabiaśpiečyć usio tuju ž stabilnaść va ŭsich śfierach.
Ciapier čytajuć
Mabilnym apierataram zabaranili zahaniać biełarusaŭ u vialiki minus8
Mabilnym apierataram zabaranili zahaniać biełarusaŭ u vialiki minus
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary