«Usio žyvoje va mnie zabili». Juryj Kaściuk, jaki byŭ ekstradziravany z Rasii, siadzić adzin u kamiery i nie atrymoŭvaje listoŭ
Žychar Bresta Juryj Kaściuk, jakoha ŭžo druhi raz pryznali palitviaźniem, zaraz znachodzicca ŭ baranavickim SIZA. U liście maci jon skardzicca, što zusim nie atrymlivaje listoŭ, a ad adzinoty možna zvarjacieć.
List pad numaram try, jaki atrymała maci, poŭny sumu.
«Nie ŭpeŭnieny, što maje listy da ciabie dachodziać, ale pišu tabie ŭžo treci list. I adzin adpraviŭ dziedu z babaj. Ja jašče nivodnaha lista nie atrymaŭ».
«Nie pieražyvaj mocna. Usio budzie dobra. Druhi raz, takija spravy. Trymajusia jak mahu. Chutčej by ŭsio heta skončyłasia. Va ŭsiaho jość miaža. U ciarpieńnia taksama.
Navinaŭ nie viedaju asabliva. Pa radyjo čuŭ pra UNS, ale biez padrabiaznaściaŭ. Amnistyja mianie nie kranie, adrazu było zrazumieła».
«Dobraha raspavieści niama čaho. Dumaju, sama razumieješ moj stan paśla pierajezdu i ŭsiaho, što adbyłosia, što adbyvajecca dalej. Navat nie viedaju, čym ja takoje zasłužyŭ. Narmalovaje takoje vyprabavańnie. Usio dobraje i žyvoje ŭva mnie prosta zabili».
«Ad taho, što rabić niama čaho, listy nie prychodzili jašče — dni ciahnucca doŭha. A adnamu ŭ kamiery siadzieć — žeść poŭnaja. Zvarjacieć možna».
Jon prosić maci akuratna pisać u listach, «kab ničoha lišniaha». Jak što, dyk list nie puściać.
Juryj Kaściuk — užo dvojčy palitviazień. Pieršy raz jaho zatrymali za toje, što ŭ vieraśni 2020 hoda jon kala haścinicy «Maładziožnaja» padčas razmovy ź siabrami tuzanuŭ dziaržaŭny ściah, jaki tam visieŭ. Ściah zvaliŭsia.
Sudździa paličyŭ Kaściuka vinavatym pa artykule 370 Kryminalnaha kodeksa i 17 listapada 2020 hoda pryznačyŭ pakarańnie (maksimalnaje pa hetym artykule) — adzin hod abmiežavańnia voli z nakiravańniem u papraŭčuju ŭstanovu adkrytaha typu.
23 listapada 2021 hoda adbyŭsia sud pa zamienie pakarańnia na bolš strohaje. U vyniku Juryju prysudzili 1 miesiac i 16 dzion kałonii ahulnaha režymu, jakija jon adbyvaŭ u hrodzienskaj turmie № 1. Paśla byŭ pieraviedzieny ŭ PK № 3.
Juryj całkam adbyŭ pakarańnie i 6 studzienia 2022 byŭ vyzvaleny.
15 lutaha 2022 Juryja iznoŭ zatrymali. 14 lutaha 2022 hoda čat «Valejboł pa vychodnych» byŭ pryznany ekstremisckim farmiravańniem. Siarod jaho ŭdzielnikaŭ, pavodle abvinavačvańnia, byŭ i Kaściuk.
Juryj byŭ abjaŭleny ŭ miždziaržaŭny vyšuk i 15 maja 2022 hoda zatrymany ŭ Sočy. Jon padaŭsia na status uciekača, paśla admovy dać jamu prytułak vyrašyŭ abskardzić rašeńnie.
Niahledziačy na praces, 13 kastryčnika prystavy advieźli Juryja ŭ aeraport dla ekstradycyi. Pry hetym jaho źbivali pa darozie. U aeraporcie Juryj sprabavaŭ naškodzić sabie i parezaŭ žyvot, kab spynić katavańni i niezakonnuju ekstradycyju. Jaho viarnuli ŭ centr časovaha ŭtrymańnia zamiežnych hramadzian, dzie jon źniaŭ paboi.
16 kastryčnika Juryja Kaściuka vyvieźli ŭ Biełaruś i źmiaścili ŭ IČU Pružanaŭ, a paźniej pieraviali ŭ baranavicki SIZA-6.
Padtrymać Juryja Kaściuka možna listom na adras:
SIZA-6. 225413, h. Baranavičy, vuł. Bresckaja, 258 V, Kaściuk Juryj Andrejevič.
Ciapier čytajuć
Zatrymany ŭ Polščy biełaruski taksist-špijon byŭ siabram «Paspalitaha rušeńnia»9
Kamientary