«Ahient moh bačyć asabistyja danyja ludziej, jakija dasyłali infarmacyju ŭ bot». Viačorka i «Infapojnt» prakamientavali situacyju z ČKB
Daradca Śviatłany Cichanoŭskaj Franak Viačorka i kamanda «Infapojnta» prakamientavali adkryty list-zvarot Janiny Sazanovič da jaho. U im byłaja redaktarka «Čornaj knihi Biełarusi» vystaviła šerah patrabavańniaŭ.
Skandał razhareŭsia vakoł situacyi z ČKB (inicyjatyva pa apubličvańni danych tych, chto datyčny da represij), u jakuju zmoh ukaranicca supracoŭnik HUBAZiKa Artur Hajko. Jon atrymaŭ dostup da čataŭ, kantaktaŭ infarmataraŭ, a taksama niejki čas navat kiravaŭ arhanizacyjaj. Adzin z supracoŭnikaŭ ČKB — Daniła Bahdanovič — nie vieryfikavaŭ ahienta naležnym čynam i ihnaravaŭ sihnały kaleh ab padazronaści novaha čalca kamandy.
Hajko taksama atrymaŭ dostup da pracy ahienctva «Infapojnt», stvaralnikam jakoha byŭ Franak Viačorka.
U adkrytym liście Janina Sazanovič, aproč inšaha, patrabavała akazać finansavuju dapamohu siemjam zatrymanych infarmataraŭ ČKB, dapamahčy evakujavać tych infarmataraŭ, jakich pakul nie aryštavali. Taksama adchilić ad pracy ŭ «Infapojncie» ludziej, jakija ŭvachodziać u Ofis Śviatłany Cichanoŭskaj, kab vyklučyć kanflikt intaresaŭ, i zvolnić Daniłu Bahdanoviča.
«Mianie aburaje situacyja z HUBAZiKam nie mienš za Janinu»
Franak Viačorka kaža, što pretenzii nie da jaho. Pa jaho słovach, jon nie maje dačynieńnia da «Čornaj knihi Biełarusi» i da źjaŭleńnia supracoŭnika HUBAZiKa ŭ kamandzie.
«Ja razumieju kryk dušy Janiny. Mianie aburaje situacyja z HUBAZiKam nie mienš za jaje. Heta zamoŭčvać nielha, tryvožny zvanok usim, chto pracuje ŭ demakratyčnym ruchu — dbać najpierš pra biaśpieku ludziej: i tych, chto z vami pracuje, i tych, chto ŭ Biełarusi.
Ja ŭžo kazaŭ raniej, što ŭ «Infapojncie» nie ŭpłyvaju na niešta i nie prymaju rašeńni. Na płaniorkach redakcyi byŭ adzin raz, dzie raskazvaŭ pra palityčnyja pazicyi Ofisa. Tłumačyć situacyju pavinny sami ŭdzielniki ČKB i «Infapojntu», — skazaŭ Franak Viačorka.
«Supracoŭnik, jaki pryniaŭ na pracu ŭ ČKB ahienta śpiecsłužbaŭ, adchileny ad pracy»
Taksama siońnia paśla adkrytaha lista-zvarotu Janiny Sazanovič kamanda Infopoint Media Network prakamientavała infarmacyju ab ahiencie śpiecsłužbaŭ.
«Infopoint Media Network byŭ zarehistravany ŭ červieni 2021 hoda, praź miesiac paśla vykryćcia ahienta. Ale isnavaŭ čat z adnajmiennaj nazvaj u telehramie, kudy ŭvachodzili ŭdzielniki šerahu prajektaŭ, niekatoryja ź ich paźniej stali častkaj Infopoint Media Network. U čacie było niekalki dziasiatkaŭ čałaviek: aktyvisty, błohiery, redaktary, žurnalisty, ekśpierty. U čat byŭ uklučany i piersanaž, jaki, jak było ŭstanoŭlena ŭdzielnikami prajekta, akazaŭsia ahientam śpiecsłužbaŭ.
Śćviardžeńni ab tym, što jon nibyta kiravaŭ słužbaj biaśpieki našaj arhanizacyi, nie adpaviadajuć rečaisnaści. Jon zajmaŭsia redahavańniem kantentu dla «Čornaj knihi Biełarusi», — paviedamili ŭ Infopoint Media Network.
«My apytali supracoŭnikaŭ prajekta i ŭstanavili, što ahient moh bačyć asabistyja danyja karystalnikaŭ telehram (niknejm i numar telefona, kali jon nie byŭ schavany), jakija dasyłali infarmacyju ŭ bot, — raskazała kamanda. —
Aktyvisty prasili ludziej vykarystoŭvać ananimnyja akaŭnty i VPN, ale nie ŭsie karystalniki bota, na žal, heta rabili. Hetyja ludzi mahli paciarpieć.
Dakładnaja ich kolkaść nieviadomaja, pakolki my razumiejem, što zvyčajnaja praktyka biełaruskich śpiecsłužbaŭ zaklučajecca ŭ vykarystańni vydumanych abvinavačańniaŭ, u tym liku i abvinavačańniaŭ u pieradačy infarmacyi ŭ ČKB. A ŭ jakaści dokaznaj bazy vykarystoŭvajucca atrymanyja pad katavańniami i ciskam pryznańni».
Daniła Bahdanovič, pa słovach kamandy Infopoint Media Network, jaki pryniaŭ na pracu ŭ ČKB ahienta śpiecsłužbaŭ i padtrymlivaŭ kantakt ź im, adchileny ad pracy z prajektami i kamandami Infopoint Media Network z 19 kastryčnika 2022 hoda.
«My praciahvajem zajmacca žurnalisckimi rasśledavańniami, ale ciapier bolš aściarožna padychodzim da naboru supracoŭnikaŭ, razumiejučy ŭsie mahčymyja nastupstvy i ŭličvajučy sumny dośvied. Jak i ŭsim našym kaleham u biełaruskich miedyja, nam daviałosia pierabudoŭvacca i vučycca, u tym liku na svaich pamyłkach.
My škadujem ab tym, što adbyłosia, i prynosim prabačeńni ŭsim, chto moh paciarpieć.
Kali łaska, nie pytajcie nas ab imionach, ludziach, jakija mieli dačynieńnie da situacyi, i detalach. My nie chočam stvarać novuju patencyjnuju pahrozu ŭsim, chto pracuje z nami, i dapamahać śpiecsłužbam i prapahandystam. My razumiejem, što siły śpiecsłužbaŭ nakiravanyja na toje, kab nackoŭvać ludziej, jakija pracujuć na dasiahnieńnie adnoj mety.
Zaklikajem usich biełarusaŭ — dzie b vy ni znachodzilisia — vykonvać bazavyja praviły biaśpieki: nie vykarystoŭvać sapraŭdnyja imiony pry rehistracyi ŭ telehram, čyścić čaty, vykarystoŭvać dvuchfaktarnyja aŭtentyfikacyi i dumać pra biaśpieku ŭ pieršuju čarhu. Dziakuj biełaruskim niezaležnym miedyja, jakija ŭźniali prablemu, — my praviali ŭnutranaje rasśledavańnie i pryniali miery», — prakamientavała kamanda Infopoint Media Network.
Čytajcie taksama:
«Zvolnicie Bahdanoviča, adździalicie «Infapojnt». Byłaja redaktarka ČKB apublikavała patrabavańni da Franaka Viačorki
«Kazaŭ, što ŭ jaho maci ŭ zakładnikach i my ničoha nie razumiejem». Byłaja redaktarka ČKB pra situacyju z ahientam u kamandzie
Hubazikaviec dzieviać miesiacaŭ byŭ u kamandzie Čornaj knihi Biełarusi. I ŭrešcie ŭznačaliŭ jaje
Ciapier čytajuć
Što zdaryłasia z vykładčykam BNTU Michaiłam Ščukinym, jaki pamior pry zatrymańni. Viersija milicyi22
Kamientary