U Šatłandyi futbalistam zabaroniać bić pa miačy hałavoj napiaredadni i na nastupny dzień paśla matča. I voś čamu
Prafiesijnym futbalistam u Šatłandyi zabaroniać hulać hałavoj na treniroŭkach napiaredadni matča i na nastupny dzień paśla jaho. Heta źviazana z daśledavańniem Univiersiteta Hłazha, jakoje pakazała, što byłyja futbalisty ŭ try z pałovaj razy čaściej pamirajuć ad zachvorvańniaŭ hałaŭnoha mozhu, piša «Bi-bi-si».
Pa słovach nieŭrapatołaha Uili Ściuarta, jaki ŭznačalvaŭ daśledavańnie, ryzyka dla prafiesijnych futbalistaŭ varjirujecca ad piacirazovaha pavieličeńnia šancaŭ chvaroby Alchiejmiera da prykładna čatyrochrazovaha pavieličeńnia chvaroby ruchalnych niejronaŭ i da dvuchrazovaha pavieličeńnia vypadkaŭ chvaroby Parkinsana.
Navukoŭcy ličać, što heta moža być źviazana z rehularnymi ŭdarami hałavoj pa miačy.
«Paśla sieryi udaraŭ hałavoj nazirajecca paharšeńnie pamiaci, jakoje praciahvajecca 24—48 hadzin. U futbalistaŭ taksama naziralisia źmieny pry skanavańni mozhu, jakija mohuć być źviazanyja z takimi ŭdarami», — tłumačyć doktar šatłandskaj futbolnaj asacyjacyi (SFA) z bolš čym 20-hadovym vopytam Džon Maklin, jaki braŭ udzieł u daśledavańniach.
Akramia taho, futbolnym kłubam zahadana skaracić kolkaść trenirovak, dzie ŭdar hałavoj adpracoŭvajecca jak paŭtaralnaje praktykavańnie, da adnaho dnia na tydzień.
Šatłandskaja futbolnaja asacyjacyja ŭžo raspracavała praviły, jakija abmiažoŭvajuć hulniu hałavoj u junackim futbole, a taksama zabaronu na vykarystańnie hulni hałavoj na treniroŭkach dla ŭzrostavaj hrupy da 12 hadoŭ.
Novyja praviły ŭvodziacca paśla kansultacyj z 50 prafiesijnymi mužčynskimi i žanočymi kłubami ŭ Šatłandyi, a taksama paśla apytańnia kłubaŭ SFA.
Šatłandyja taksama stała pieršaj krainaj u śviecie, u jakoj byŭ pryniaty adziny zvod rekamiendacyj adnosna vypadkaŭ strasieńnia mozhu dla ŭsich vidaŭ sportu i praviedziena kampanija pad łozunham «If in doubt, sit them out», što možna pieravieści jak «Jość sumnievy — lepš pierasiedzieć». Havorka idzie pra toje, što kali ŭ treniera abo piersanału jość padazreńni, što spartsmien atrymaŭ strasieńnie mozhu ci traŭmu hałavy, jaho nieabchodna vyvieści z hulni abo treniroŭki.
Spartyŭny karespandent «Bi-bi-si» ŭ Šatłandyi Krys Makłaflen adznačaje, što navukoŭcy zafiksavali suviaź pamiž hulnioj u futboł i paškodžańniami mozhu, adnak navuka ŭsio jašče nie moža z absalutnaj upeŭnienaściu rastłumačyć, čamu tak adbyvajecca. Choć daśledavańni adznačajuć, što najbolš schilnyja da hetaj ryzyki abaroncy, jakija pa statystycy hulajuć hałavoj čaściej, čym astatnija.
«Ekśpierty nie chočuć vypraboŭvać los. Na dokaz hipotez dla atrymańnia dakładnaha adkazu mohuć syści dziesiacihodździ, ale navukoŭcy nie chočuć čakać. Trendy ŭ hulni ciapier takija, što hałavoj i tak hulajuć mienš, a pad ciskam novych navukovych źviestak niaciažka ŭjavić sabie futboł budučyni, dzie hałavoj nie buduć hulać zusim», — padkreślivaje karespandent «Bi-bi-si».
Kamientary