Technałohii mahnitnaha pola nablizili pryručeńnie termajadziernaj enierhii

Termajadziernaja enierhietyka — heta forma vypracoŭki enierhii pry dapamozie reakcyj jadziernaha sintezu, u pracesie jakoha dva bolš lohkija atamnyja jadry abjadnoŭvajucca i ŭtvarajuć bolš ciažkaje jadro — i pry hetym vydzialajecca enierhija. Daśledavańni termajadziernych reaktaraŭ pačalisia jašče ŭ 1940-ja hady, ale pa stanie na 2022 hod nivodnaja kanstrukcyja nie davała stanoŭčaha kaeficyjenta ŭzmacnieńnia termajadziernaj enierhii, h.zn. vychodnaja mahutnaść pakul mienšaja, čym uvachodnaja.

Ale enierhija termajadziernaha sintezu moža być bolš realistyčnaj pierśpiektyvaj, čym vy dumajecie. U novym daśledavańni navukoŭcy, jakija spadziajucca vykarystać jadzierny sintez — tuju samuju krynicu enierhii, jakaja siłkuje Sonca i inšyja zorki, — paćvierdzili, što mahnitnyja pali mohuć pavialičyć vychad enierhii ŭ ich ekśpierymientach. 

Jak paviedamlaje vydańnie Vice, daśledčyki Liviermarskaj nacyjanalnaj łabaratoryi ŭ Kalifornii vyjavili, što novaja ŭstanoŭka mahnitnaha pola bolš čym u try razy pavialičyła vychad enierhii «haračaj kropki» termajadziernaj reakcyi ŭ ekśpierymientach i trochi nabliziłasia da ŭzroŭniu, nieabchodnaha dla samapadtrymalnaha zapalvańnia ŭ płaźmie.

«U vas jość toje, što my nazyvajem haračaj kropkaj. Heta miljony hradusaŭ, i vakoł ich prosta pakajovaja tempieratura. Usio heta ciapło choča vyciakać, tamu što ciapło zaŭsiody idzie ad haračaha da chałodnaha, a mahnitnaje pole praduchilaje heta», — raspaviadaje kiraŭnik daśledavańnia Džon Mudzi. Takim čynam mahnitnaje pole tut dziejničaje nakštałt izalatara.

Haračyja kropki ŭ takich ekśpierymientach zvyčajna stvarajucca šlacham stralby z amal 200 łazieraŭ u malusieńkija hranuły paliva, zroblenyja z bolš ciažkich izatopaŭ (abo ich viersij) vadarodu, takich jak dejteryj i trytyj. Hetyja łaziernyja vybuchi stvarajuć renthienaŭskaje vypramieńvańnie, jakoje prymušaje nievialikuju kapsułu vybuchać, stvarajučy ekstremalnyja cisk i tempieraturu, nieabchodnyja dla źlićcia izatopaŭ i vyzvaleńnia ich vielizarnych zapasaŭ enierhii.

Ideja vykarystańnia mahnitaŭ dla nahrevu paliva nie novaja. U 2012 hodzie navukoŭcy z Univiersiteta Ročestera vyjavili, što jany mohuć vykarystoŭvać mahnietyzm u svaich intaresach. Adnak vyšejapisanaje daśledavańnie ŭ Liviermarskaj nacyjanalnaj łabaratoryi było značna bolš efiektyŭnym: «haračaja kropka» była na 40% haračejšaj i davała enierhii jak minimum u 3 razy bolš — u paraŭnańni z papiarednimi ekśpierymientami. Taki vynik akazaŭsia navat lepšym za prahnozy. 

Adnak da źjaŭleńnia praktyčnych termajadziernych reaktaraŭ usio jašče šmat hadoŭ. Bolšaść ekśpiertaŭ ličać, što na stvareńnie pracoŭnaha termajadziernaha reaktara spatrebiacca dziesiacihodździ, pry ŭmovie, što heta ŭvohule mahčyma. Vychad enierhii pa-raniejšamu značna mienšy, čym toj, jaki nieabchodny dla stvareńnia samapadtrymalnych reakcyj. 

Adnak hetaja znachodka robić zapalvańnie značna bolš dasiahalnym, i heta, u svaju čarhu, pavyšaje šancy na stvareńnie enierhietyčna-stanoŭčaj sistemy termajadziernaha sintezu. Heta taksama nie kaniec ekśpierymientaŭ z mahnietyzmam. Budučy test budzie vykarystoŭvać kryjahiennuju kapsułu, pakrytuju lodam, kab dapamahčy zrazumieć fiziku termajadziernaha sintezu.

Vyniki daśledavańnia śviedčać pra toje, što mahnity mohuć adyhrać klučavuju rolu ŭ raźvićci hetaj futurystyčnaj formy enierhii, jakaja tearetyčna moža zabiaśpiečyć amal biaźmiežny zapas čystaj enierhii.

• 27
• 0
• 0
• 0
• 2
• 1
• 2
• 0