ISW: Maskva, mahčyma, rychtuje zimovy nastup, ale jon naŭrad ci budzie paśpiachovym
Amierykanski Instytut vyvučeńnia vajny (ISW) u apošniaj sa svaich štodzionnych zvodak-analizaŭ vykazvaje zdahadku, što pakaz u apošnija dni pa rasijskim telebačańni pajezdak i naradaŭ vajennaha i palityčnaha kiraŭnictva Rasii, a taksama zapłanavanaja na paniadziełak sustreča Pucina i Łukašenki śviedčać pra padrychtoŭku Maskvoj niejkich rašučych dziejańniaŭ na froncie ŭ blizkija miesiacy — ale hetyja dziejańni naŭrad ci buduć paśpiachovymi.
ISW ličyć, što pakaz u apošnija dva dni narady prezidenta Rasii Uładzimira Pucina ź ministram abarony Siarhiejem Šajhu, načalnikam hienštaba Valeryjem Hierasimavym i kamandujučym rasijskimi siłami va Ukrainie Siarhiejem Suravikinym, a taksama pajezdki Šajhu ŭ Paŭdniovuju vajennuju akruhu — heta adkaz na pretenzii i krytyku rasijskich vajskoŭcaŭ błohieraŭ-ultranacyjanalistaŭ, ale nie tolki.
«Upartyja sproby rasijskich vajennych čynoŭnikaŭ pakazać, što jany aktyŭna ŭdzielničajuć u płanavańni vajennych dziejańniaŭ i kantralujuć ich, asabliva ŭ adsutnaść peŭnych pieramoh u Ukrainie, mohuć aznačać, što Rasija rychtujecca ŭ najbližejšyja miesiacy adnavić nastup va Ukrainie», — pišuć analityki ISW.
Prykmiety padrychtoŭki takoha nastupu jany bačać i ŭ majučaj adbycca ŭ paniadziełak sustrečy Pucina i Alaksandra Łukašenki: amierykanskija ekśpierty ŭśled za šmatlikimi ŭschodniejeŭrapiejskimi kalehami miarkujuć, što Pucin znoŭ budzie schilać Łukašenku da bolš aktyŭnaha ŭdziełu ŭ vajnie.
Adnak ci budzie zdolnaja rasijskaja armija na paśpiachovy nastup u chutkim časie — na hety kont u ISW zachoŭvajucca vialikija sumnievy.
Mabilizavanyja reziervisty i pryzyŭniki, na dumku ekśpiertaŭ, jašče nie navučacca vajavać dastatkova dobra, kab pravodzić chutkija i paśpiachovyja apieracyi. Da taho ž u Rasii nie chapaje tankaŭ, artyleryi i dalnabojnaj zbroi, i hetaja prablema naŭrad ci budzie vyrašana ŭžo hetaj zimoj.
«Pucin usio roŭna moža addać zahad ab vialikich nastupalnych apieracyjach užo zimoj, ale važna nie pieraaceńvać zdolnaść rasijskich abo złučanych rasijska-biełaruskich sił paśpiachova pravodzić takija apieracyi», — piša ISW.
Da taho ž, pavodle acenki amierykanskich analitykaŭ, Łukašenka naŭrad ci pahodzicca pasłać svaju armiju va Ukrainu.
Ciapier čytajuć
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu7
Kamientary