ISW: Масква, магчыма, рыхтуе зімовы наступ, але ён наўрад ці будзе паспяховым
Амерыканскі Інстытут вывучэння вайны (ISW) у апошняй са сваіх штодзённых зводак-аналізаў выказвае здагадку, што паказ у апошнія дні па расійскім тэлебачанні паездак і нарадаў ваеннага і палітычнага кіраўніцтва Расіі, а таксама запланаваная на панядзелак сустрэча Пуціна і Лукашэнкі сведчаць пра падрыхтоўку Масквой нейкіх рашучых дзеянняў на фронце ў блізкія месяцы — але гэтыя дзеянні наўрад ці будуць паспяховымі.
ISW лічыць, што паказ у апошнія два дні нарады прэзідэнта Расіі Уладзіміра Пуціна з міністрам абароны Сяргеем Шайгу, начальнікам генштаба Валерыем Герасімавым і камандуючым расійскімі сіламі ва Украіне Сяргеем Суравікіным, а таксама паездкі Шайгу ў Паўднёвую ваенную акругу — гэта адказ на прэтэнзіі і крытыку расійскіх вайскоўцаў блогераў-ультранацыяналістаў, але не толькі.
«Упартыя спробы расійскіх ваенных чыноўнікаў паказаць, што яны актыўна ўдзельнічаюць у планаванні ваенных дзеянняў і кантралююць іх, асабліва ў адсутнасць пэўных перамог у Украіне, могуць азначаць, што Расія рыхтуецца ў найбліжэйшыя месяцы аднавіць наступ ва Украіне», — пішуць аналітыкі ISW.
Прыкметы падрыхтоўкі такога наступу яны бачаць і ў маючай адбыцца ў панядзелак сустрэчы Пуціна і Аляксандра Лукашэнкі: амерыканскія эксперты ўслед за шматлікімі ўсходнееўрапейскімі калегамі мяркуюць, што Пуцін зноў будзе схіляць Лукашэнку да больш актыўнага ўдзелу ў вайне.
Аднак ці будзе здольная расійская армія на паспяховы наступ у хуткім часе — на гэты конт у ISW захоўваюцца вялікія сумневы.
Мабілізаваныя рэзервісты і прызыўнікі, на думку экспертаў, яшчэ не навучацца ваяваць дастаткова добра, каб праводзіць хуткія і паспяховыя аперацыі. Да таго ж у Расіі не хапае танкаў, артылерыі і дальнабойнай зброі, і гэтая праблема наўрад ці будзе вырашана ўжо гэтай зімой.
«Пуцін усё роўна можа аддаць загад аб вялікіх наступальных аперацыях ужо зімой, але важна не пераацэньваць здольнасць расійскіх або злучаных расійска-беларускіх сіл паспяхова праводзіць такія аперацыі», — піша ISW.
Да таго ж, паводле ацэнкі амерыканскіх аналітыкаў, Лукашэнка наўрад ці пагодзіцца паслаць сваю армію ва Украіну.
Цяпер чытаюць
Калеснікава: «Мяне шакуе маштаб нянавісці і агрэсіі». Марыя патлумачыла, што для яе значыць вяртанне да нармальнасці38
Каментары