Žycharku Ciumieni ŭsio-taki aštrafavali za nadpis «Nie v***ie». Jana nastojvała, što havorka idzie pra vobłu
Centralny rajonny sud Ciumieni z druhoj sproby pryznaŭ miascovuju žycharku Alisu Klimientavu vinavataj u «dyskredytacyi» rasijskaj armii z-za nadpisu na asfalcie «Nie v***ie», piša Bi-bi-si.
Klimientavaj pryznačyli 30 tysiač rasijskich rubloŭ štrafu (kala 485 dalaraŭ), paviedamlaje abjadnanaja pres-słužba sudoŭ Ciumienskaj vobłaści. Upieršyniu sud razhledzieŭ administracyjny pratakoł u dačynieńni da Klimientavaj z-za nadpisu «Nie v***ie!» ŭ kastryčniku.
Jak pisali miascovyja ŚMI, 24 vieraśnia dziaŭčyna vyjšła na płošču Adzinstva i Zhody i zrabiła nadpis krejdaj na asfalcie. Palicejskija zapadozryli ŭ hetym «vyražeńnie niehatyŭnaha staŭleńnia da rasijskich Uzbrojenych sił» i dastavili jaje ŭ pastarunak.
Dziaŭčyna zajaviła, što mieła na ŭvazie «nie voble», a nie «nie vajnie», bo «adčuvaje niepryjaznaść da hetaha vidu ryb». U vyniku sud spyniŭ spravu, pakazaŭšy, što palicyi nie ŭdałosia abvierhnuć takoje tłumačeńnie. Klimientavaj navat viarnuli krejdu, jakoj jana zrabiła nadpis.
Paśla naviny ab hetym rašeńni suda — adnym ź niamnohich vypadkaŭ, kali ŭdałosia damahčysia admieny pratakoła ab «dyskredytacyi» armii, — vobła stała svojeasablivym simvałam antyvajennych nastrojaŭ.
Palicyja padała apielacyju, i ŭ kancy listapada sprava Klimientavaj była nakiravanaja na novy razhlad. U vyniku sud paličyŭ, što žycharka Ciumieni ŭsio ž vystupała nie suprać ryby.
Pa danych ŚMI i pravaabaroncaŭ, z pačatku sakavika, kali artykuł «Publičnyja dziejańni, nakiravanyja na dyskredytacyju vykarystańnia Uzbrojenych Sił Rasijskaj Fiederacyi» (20.3.3 KaAP), źjaviŭsia ŭ Administracyjnym kodeksie, pa im było składziena bolš za piać tysiač pratakołaŭ.
Artykuł praduhledžvaje pakarańnie ŭ vyhladzie štrafu ad 30 da 50 tysiač rubloŭ. Na praciahu hoda paśla ŭstupleńnia rašeńnia suda ŭ siłu na čałavieka mohuć zavieści kryminalnuju spravu za anałahičnaje parušeńnie.
Čaściakom palicyja i sudy razhladajuć u jakaści «dyskredytacyi» armii dosyć niečakanyja rečy. U pačatku śniežnia ŚMI paviedamlali, što žychara Čyty aštrafavali na 30 tysiač rubloŭ za pierakaz u sacsietkach snu pra prezidenta Ukrainy Uładzimira Zialenskaha.
Ciapier čytajuć
Zahinuŭ biełaruski dobraachvotnik Alaksiej Łazaraŭ7
Kamientary