Pad Barsiełonaj syšoŭ z rejek ciahnik, zahinuŭ mašynist, dziasiatki ludziej paranieny

Pavodle źviestak miascovych uładaŭ, u aŭtorak uviečary ciahnik kampanii Rodalies sutyknuŭsia z padpornaj ścianoj, jakaja abrynułasia na čyhuncy pamiž Želidaj i San-Sadurni ŭ Katałonii, prykładna za 35 km na zachad ad Barsiełony.

Miascovaja pažarnaja słužba paviedamiła, što da miesca zdareńnia byli nakiravany 35 bryhad, i adzin pasažyr, zabłakavany ŭ ciahniku, byŭ vyratavany.

Paźniej pažarnaja słužba ŭdakładniła, što ŭnutry ciahnika nikoha nie zastałosia, i vyratavalnyja bryhady abśledujuć terytoryju ŭ rajonie zdareńnia, kab vyklučyć inšych paciarpiełych.

Słužby ekstrannaj dapamohi paviedamili, što častka paranienych była evakuiravana ŭ raźmieščanyja niepadalok balnicy Mojzies Brodžy, Bielvitže i Viła-Franka.

Z 37 paciarpiełych piać čałaviek atrymali surjoznyja traŭmy, jašče šeść znachodziacca ŭ mienš ciažkim stanie, a 26 — u stanie «lohkaj ciažkaści», paviedamili ŭ słužbie chutkaj dapamohi.

Katastrofa adbyłosia na fonie mocnych štormaŭ, jakija abrynulisia na paŭnočny ŭschod Ispanii.

Mnohija prybiarežnyja rajony na ŭschodzie i paŭnočnym zachadzie Ispanii znachodziacca ŭ stanie pavyšanaj hatoŭnaści z-za niepahadzi, jakaja taksama zakranuła ispanskija Pireniei, dzie prajšli śniehapady, i vostraŭ Maljorku, na ŭźbiarežža jakoha abrynulisia štormy, jakija vyklikali chvali vyšynioj niekalki mietraŭ.

Ruch spynieny

U aŭtorak na pryharadnaj čyhuncy na paŭnočny ŭschod ad Barsiełony taksama syšoŭ z rejek jašče adzin ciahnik.

«U voś urezaŭsia kamień, vykinuty štormam», — havorycca ŭ zajavie kampanii-apieratara čyhunačnaj sietki Adif. Ciahnik išoŭ pamiž Błaniesam i Masaniet-Masaniesam. Pra paciarpiełych nie paviedamlajecca, ruch ciahnikoŭ prypynieny.

Pavodle danych ispanskaj haziety El Pais, kala 400 000 pasažyraŭ, jak čakajecca, zastanucca biez čyhunačnaha złučeńnia ŭ sieradu ranicaj.

Ruch ciahnikoŭ pa ŭsioj pryharadnaj čyhunačnaj sietcy Rodalies całkam prypynieny na čas praviadzieńnia pravierak biaśpieki.

Čakajecca, što paśla pravierak apieratary čyhunak sustrenucca z uładami.

Avaryi ŭ Katałonii adbylisia praz dva dni paśla sutyknieńnia dvuch chutkasnych ciahnikoŭ u Adamuzie, Andałusija, — najbujniejšaj čyhunačnaj katastrofy ŭ Ispanii za bolš čym dziesiacihodździe.

Prynamsi 42 čałavieki zahinuli paśla taho, jak vahony ciahnika, jaki išoŭ z Małahi ŭ Madryd, syšli z rejek, vyjechali na sustrečnyja rejki i sutyknulisia z sustrečnym chutkasnym ciahnikom niedaloka ad horada Kordava na poŭdni Ispanii.

• 0
• 0
• 0
• 1
• 0
• 3
• 0
• 0