U Iranie nie mienš za 100 udzielnikaŭ pratestaŭ asudžanyja da śmiarotnaha pakarańnia

Pry hetym pravaabaroncy kažuć, što nasamreč pakarańnie pahražaje našmat bolšaj kolkaści ŭdzielnikaŭ pratestaŭ, adnak ich siemji nie raskazvajuć pra heta, bo aścierahajucca ŭładaŭ.

U śniežni paśla pakazalnych sudoŭ užo było pakarana dvoje maładych irancaŭ — Machsien Šekary i Madžydreza Rachnavard. Revalucyjny sud pryznaŭ ich vinavatymi ŭ «vajnie suprać Ałacha», što źjaŭlajecca parušeńniem vielmi raspłyvistaha zakona ab nacyjanalnaj biaśpiecy.

U Iranie voś užo bolš za sto dzion praciahvajucca pratesty suprać relihijnaha dyktatu ŭładaŭ, padstavaj dla jakich pasłužyła śmierć maładoj iranki Machsi Amini. Jana była zatrymanaja ŭ Tehieranie palicyjaj noravaŭ za parušeńnie isłamskaha dres-kodu 18 vieraśnia, joj stała drenna ŭ palicejskim učastku, dziaŭčyna trapiła ŭ komu i nieŭzabavie pamierła.

Hetyja akcyi pratestu ŭłady pasprabavali pradstavić jak bunt, arhanizavany zvonku, i stali ŭžyvać zbroju. U vyniku, pa danych IHR, u Iranie zahinuła ŭžo, prynamsi, 64 dziciaci i 34 žančyny.

U dakładzie pravaabaroncaŭ, apublikavanym u aŭtorak, nazvanyja imiony sta čałaviek, jakim užo vyniesienyja abo chutka buduć abvieščanyja śmiarotnyja prysudy, pra što paviedamili albo sami ŭłady, albo svajaki padsudnych ci žurnalisty.

U dakładzie adznačajecca, što ŭsie padabaronnyja byli pazbaŭlenyja prava dostupu da advakataŭ, naležnaj pravavoj pracedury i spraviadlivaha sudovaha razboru.

«U tych vypadkach, kali im udavałasia vyjści na suviaź abo kali padrabiaznaści ich spraŭ byli paviedamlenyja sukamiernikami ci pravaabaroncami, usie hetyja ludzi padviarhalisia fizičnym i psichałahičnym katavańniam z metaj vybić ź ich iłžyvyja pryznalnyja pakazańni», — śćviardžaje IHR.

Pavialičyć

Siarod tych, kamu pahražaje pakarańnie, akazaŭsia i 22-hadovy Machamad Habadła: u subotu Viarchoŭny sud pakinuŭ u sile vyniesieny jamu śmiarotny prysud. Jaho taksama asudzili za «vajnu suprać Ałacha» paśla taho, jak padčas vieraśnioŭskich pratestaŭ u Tehieranie jon zajechaŭ na mašynie ŭ hrupu palicejskich, zadušyŭšy adnaho ź ich.

Pa słovach jaho maci, Machamad pakutuje ad bipalarnaha rasstrojstva, a na siesiju suda nie byŭ dapuščany abrany im advakat.

Pravaabarončaja arhanizacyja Amnesty International vykazała aściarohi, što Habadłu mahli katavać ci drenna abychodzicca ź im, pra što moža śviedčyć miedycynskaje zaklučeńnie, u jakim adznačany rany i siniaki na rukach, łokciach i łapatcy.

Nastaŭnicy kurdskaj movy i pravaabaroncy Machhan Kavusi byli vystaŭlenyja abvinavačvańni ŭ «suśvietnaj karupcyi». U pačatku sudovaha pracesu prakuror zajaviŭ, što Kavusi «svaimi pastami ŭ sacsietkach pravakavała ludziej na raspustu», i ciapier joj, jak i piaci inšym žančynam, moža pahražać najvyšejšaja miera.

«Abviaščajučy śmiarotnyja prysudy i pryvodziačy niekatoryja ź ich u vykanańnie, ułady chočuć prymusić ludziej razyścisia pa damach», — zajaviŭ žurnalistam dyrektar IHR Machmud Amiry Mahadam. Pa jaho słovach, heta zrabiła peŭny efiekt, ale ŭ cełym nazirajecca jašče bolšaja žorstkaść u adnosinach da ŭładaŭ.

• 2
• 0
• 0
• 1
• 4
• 3
• 19
• 0