Chryścina Rychter pryznačana daradcaj Śviatłany Cichanoŭskaj pa pravavych pytańniach. Jakija buduć jaje funkcyi na hetaj pasadzie?
Viadoma, što Chryścina Rychter 10 hadoŭ praktykuje prava, i ŭ apošnija hady pracuje nie tolki z nacyjanalnymi, ale i ź mižnarodnymi miechanizmami abarony pravoŭ čałavieka. Ź siaredziny 2021 hoda jana pracuje ŭ Ofisie. Dziakujučy pracy ŭ tym liku Chryściny Rychter, biełarusy, jakija pierajechali paśla pačatku vajny ŭ Polšču z Ukrainy i Biełarusi, majuć mienš prablem i zatrymak pry afarmleńni svajho znachodžańnia. Taksama jana kaardynavała alternatyŭny dakład pa vykanańni Respublikaj Biełaruś met ustojlivaha raźvićcia AAN.
Na novaj pazicyi daradcy pa pravavych pytańniach Chryścina Rychter pierš za ŭsio praciahnie kaardynacyju raboty pa pryciahnieńni asob, adkaznych za parušeńnie pravoŭ čałavieka z vykarystańniem instrumientaŭ univiersalnaj jurysdykcyi i inšych mižnarodnych miechanizmaŭ u supracoŭnictvie z Abjadnanym pierachodnym kabinietam i pravavoj Radaj. Jana budzie abaraniać intaresy biełarusaŭ i sumiesna z pravavoj Radaj zajmacca jurydyčnym bokam dakumientaŭ dla tranzitnaha pieryjadu, paviedamlaje Ofis Śviatłany Cichanoŭskaj.
Čym jašče budzie zajmacca Chryścina Rychter:
— farmiravać stratehiju raboty pa pravavych pytańniach Ofisa Śviatłany Cichanoŭskaj;
— razam ź inšymi jurystami i arhanizacyjami zajmacca padrychtoŭkaj narmatyŭnych pravavych dakumientaŭ dla tranzitnaha pieryjadu ŭ śfierach pierachodnaj spraviadlivaści, reabilitacyi asob, jakija padvierhlisia pieraśledu pa palityčnych matyvach;
— udzielničać u padrychtoŭcy śpiecyjalnaha dakłada pa prablemach biełarusaŭ u emihracyi ŭ Parłamienckuju asambleju Rady Jeŭropy;
— pracavać razam ź biełaruskaj pravaabarončaj supolnaściu dla dasiahnieńnia met pa prasoŭvańni i abaronie pravoŭ čałavieka.
Ciapier čytajuć
Maŭrykij, Siejšeły, Šry-Łanka i nie tolki: pahladzieli, kudy źbiehli ad biełaruskich marazoŭ praŭładnyja artysty i viadučyja13
Kamientary