«Pad mudrym kiraŭnictvam architektara suvierennaj Biełarusi». Kačanava zadaje novy kanon kulta asoby
Staršynia Savieta Respubliki Natalla Kačanava skarystała trybunu Mižnarodnaj navukova-praktyčnaj kanfierencyi «Biełaruskaje pravasudździe: histaryčny vopyt i sučasnaść», kab uziać novyja viaršyni ŭsłaŭleńnia Alaksandra Łukašenki.
«Instytuty sudovaj ułady prajšli surjoznaje vyprabavańnie časam, nazapasili nieacenny vopyt savieckaj sistemy prava, škoły sudovaha ładu i sudavodstva, prymnožyli najlepšyja praktyki», — cytuje BiełTA słovy Natalli Kačanavaj.
«Stratehija na pabudovu sapraŭdnaj dziaržavy dla naroda, jakaja zaćviardžajecca na Usiebiełaruskim narodnym schodzie, całkam pradvyznačyła raźvićcio sudovaj ułady», — skazała jana.
«Pad mudrym kiraŭnictvam našaha prezidenta, architektara suvierennaj Respubliki Biełaruś, Alaksandra Łukašenki my pajšli pa evalucyjnym šlachu, biez uzrušeńniaŭ i nieabdumanaha kapiravańnia zamiežnaha vopytu.
Vyznačylisia, što, nie łamajučy składzienuju strukturu sudovaj ułady, jakaja dobra zarekamiendavała siabie, budziem udaskanalvać u spakojnym klučy. My išli ad žyćcia, ad mahčymaściaŭ dziaržavy na kankretnym etapie jaho raźvićcia. Pry hetym absalutna dakładna razumiejučy, što dla naroda hałoŭnaje — mir i stabilnaść, i sudovaja sistema pavinna pracavać pierš za ŭsio na heta», — padkreśliła Natalla Kačanava.
62-hadovaja Natalla Kačanava — adna z samych upłyvovych asob u atačeńni starejučaha dyktatara Biełarusi.
Zhodna sa źmienami, uniesienymi ŭ Kanstytucyju na refierendumie 2022 hoda, u vypadku śmierci Alaksandra Łukašenki (za vyklučeńniem vypadku jaho zabojstva) Natalla Kačanava, jak staršynia Savieta Respubliki, stanovicca jaho pierajemnicaj i kiruje krainaj da novych vybaraŭ.
Jaje karjerny ŭźlot pačaŭsia ŭ 2014 hodzie, kali Alaksandr Łukašenka, jak sam pryznavaŭsia, pa rekamiendacyi śpiecsłužbaŭ pryznačyŭ jaje na pasadu vice-premjera.
U ankiecie na sajcie Navapołackaha harvykankama Kačanava paznačała siabie jak «ruskaja». Rod jaje baćki pachodziŭ z Padmaskoŭja, svajaki pracavali na kuchni ŭ Kramli pry Iosifie Stalinie — na takuju pasadu tady dapuskali tolki ahientaŭ NKVD.
Kačanava była centralnaj asobaj u arhanizacyi adkazu dziaržavy na pandemiju kavidu, jakuju doŭhi čas zamoŭčvali i admaŭlali. Kačanava tady zasłužyła davier Alaksandra Łukašenki, bo addana pravodziła vyznačanuju im liniju, u vyniku čaho Biełaruś maje adny z najhoršych u śviecie ličby śmiarotnaści, za 2020—2021 hady nasielnictva krainy skaraciłasia na 154 tysiačy čałaviek.
Jak znak asablivaj uvahi i važnaści, Natallu Kačanavu ciapier achoŭvaje 47-hadovy Andrej Łukašyn, jaki raniej byŭ asabistym achoŭnikam Alaksandra Łukašenki.
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ10
Kamientary