«Da vajny pra biełarusaŭ słova kiepskaha nie kazaŭ». Rodnyja vajskoŭca z TRA, zahinułaha na ŭkrainska-biełaruskaj miažy, raskazali detali
33-hadovy bajec ukrainskaj terytaryjalnaj abarony Siarhiej Panasiuk zahinuŭ 25 lutaha padčas vykanańnia bajavoha zadańnia. Trahiedyja adbyłasia na naziralnym poście ŭkrainska-biełaruskaj miažy. Rodnyja vajskoŭca ličać, što jaho zabili strełam ź biełaruskaha boku, choć ukrainskija ŭłady takoj viersii nie ahučvajuć.
Pavodle aficyjnych kamientaroŭ, Siarhiej Panasiuk zahinuŭ u vyniku pierastrełki. Raspačataja kryminalnaja sprava pa artykule ab naŭmysnym zabojstvie.
«Dakładna viadoma, što streły rabilisia nie z boku Biełarusi. Detali buduć vyśvietlenyja padčas dasudovaha śledstva, jakoje praciahvajecca», — havoryć inśpiektar siektara kamunikacyi Nacpalicyi Vałynskaj vobłaści Maryna Bałdzič.
Rodzičy Siarhieja ličać, što ŭłada nie choča tłumačyć, jak jon moh zahinuć.
Raniej im kazali, što Siarhiej trapiŭ pad abstreł, jaki vioŭsia ź biełaruskaha boku, i što, nibyta, schopleny nielehał. Ciapier hetuju infarmacyju abviarhajuć.
Pa ich słovach, z dakumientaŭ, vydadzienych pa śmierci Siarhieja, havorycca, što padčas pierastrełki jon byŭ paranieny ŭ bok i kulu było ciažka znajści ŭ ciele.
Siarhiej Panasiuk z 2014 pa 2015 hod udzielničaŭ u Antyterarystyčnaj apieracyi na Łuhanščynie i Danieččynie. Z 2020 pa 2021 hady słužyŭ pa kantrakcie, a 26 lutaha 2022-ha jaho pryzvali va Uzbrojenyja siły Ukrainy.
Siarhiej byŭ małodšym siaržantam i kamandziram adździaleńnia. Mieŭ 7 bajavych uznaharodaŭ.
«Siarhiej pajšoŭ na vajnu, bo ŭ jaho było dobraje serca. Jon viedaŭ, što nas treba abaraniać. Heta byŭ toj čałaviek, pra jakoha kažuć: adzin na miljon. Jon prykład muža, baćki, syna, Prykład dla ŭsich nas. I heta nie prosta słovy», — kaža jaho siastra.
Apošni raz rodzičy bačylisia ź Siarhiejem niezadoŭha da jaho hibieli, kali toj pryjazdžaŭ u adpačynak. U jaho zastałosia dvoje dziaciej. Z žonkaju byŭ raźviedzieny. Pamiž słužbaj u vojsku pracavaŭ u kramie telefonaŭ.
Siarhiej žyŭ i zahinuŭ na Vałyni, jakaja miažuje ź Biełaruśsiu. Rodzičy kažuć, što jon da vajny nikoli nie kazaŭ ničoha kiepskaha pra biełarusaŭ.
«U nas jość svajaki ŭ Biełarusi, ale my nie padtrymlivajem ź imi suviazi, — kaža Siarhiejeva siastra. — Padčas vajny našyja pohlady ź imi razyšlisia. Spadziajusia, što paśla śmierci brata jany ŭsio pieraasensujuć. Boh im sudździa».
Rodzič Siarhieja, jaki nazvaŭsia Maksimam, adznačaje, što z vajnoj staŭleńnie da biełarusaŭ źmianiłasia.
«Jon kazaŭ, što biełarusy ŭkraincam bolš nie braty, — raskazvaje mužčyna. — Siarhiej nie razumieŭ, čamu biełarusy padtrymlivajuć ruskich, a nie vystupajuć za praŭdu i nas. Kali b nie vajna, jon by žyŭ».
Siarhieja Panasiuka pachavali 26 lutaha na mohiłkach rodnaha jamu siała Silce. Pravodzić jaho ŭ apošni šlach pryjšli ŭsie adnaviaskoŭcy, a taksama pryjechali jahonyja adnapałčanie.
«Svajoj dabrynioj, ščyraściu, svaim dalikatnym charaktaram jon zasłužyŭ miesca ŭ vaładarstvie Niabiesnym, — havoryć pra Siarhieja adnaviaskoŭka. — Jon addaŭ svajo žyćcio za nas, ciapier my možam tolki malicca za jaho i pamiatać pra jaho».
«Naša Niva» — bastyjon biełaruščyny
PADTRYMAĆ«Ja daŭ jamu pasłuchać pierachop razmoŭ rasijskich vajskoŭcaŭ. Jon źbialeŭ, potym staŭ čyrvonym». Kiraŭnik ukrainskich pamiežnikaŭ raspavioŭ pra apošniuju sustreču z Łapo
Śvińnia i parasia. Voś čamu pry lubych pieramovach Zachadu z Maskvoj pytańnie nielehitymnaści minskaha kiraŭnictva budzie pastaŭlena rubam
U Varšavie pachavali Eduarda Łobava, jaki zahinuŭ va Ukrainie
Ciapier čytajuć
Jak u halečy śpivałasia radnia Łukašenki? Małaviadomyja fakty49
Kamientary
Tamu i prabačać heta.
Vielmi škada zahinułaha!
Słava Ukraini! Žyvie Biełaruś!