IT-kampanii ź biełaruskimi karaniami zaniali za hod pałovu ajcišnych ofisaŭ Vilni
Kampanii ź biełaruskimi karaniami ŭ Litvie vyraśli za minuły hod u 3 razy pa kolkaści zarehistravanych supracoŭnikaŭ. Heta pryviało da rostu popytu na ofisnyja pamiaškańni. Pa danych mižnarodnaj kampanii Colliers, z usich ofisaŭ, arandavanych ajcišnikami za minuły hod, kala 50% źniali mienavita kampanii ź biełaruskimi karaniami, piša devby.io.
Jak adznačajuć u Colliers, 2022 hod niahledziačy na niaprostuju ekanamičnuju situacyju (rost inflacyi i cen na enierharesursy), akazaŭsia adnym z rekordnych pa kolkaści novych ofisaŭ u Vilni. Usiaho dadałosia kala 111 tysiač kv.mietraŭ jakasnych ofisnych płoščaŭ. Za apošnija 10 hadoŭ bolš praduktyŭnym byŭ tolki 2020 hod. Tady było ŭviedziena ŭ ekspłuatacyju 113 tysiač kv. mietraŭ ofisaŭ.
Za 2022 hod biznes arandavaŭ 108 tysiač kv. mietraŭ ofisnych płoščaŭ. Heta samy vysoki pakazčyk za ŭsie hady.
Najbujniejšymi arandatarami stali kampanii IT-siektara. Za hod jany źniali amal 30 tysiač kv. mietraŭ ofisaŭ, abo 28% ad ahulnaha abjomu. Heta na 8% bolš, čym u 2021 hodzie.
Siarod IT-siektara najbujniejšymi arandatarami akazalisia kampanii ź biełaruskimi karaniami. Jany arandavali kala 15 tysiač kv.mietraŭ ofisaŭ z 30 tysiač.
Najbujniejšyja zamiežnyja kampanii-arandatary ŭ IT ź biełaruskimi karaniami — Wargaming, Flo, Melsoft, EPAM, EIS Group.
Zrešty, sioleta popyt na ofisy z boku ajcišnikaŭ moža źnizicca. Jak adznačajuć analityki Colliers, bolšaja častka IT-kampanij adkryłasia ŭ Litvie ŭ 2020-2021 hadach. Aktyŭny popyt na ofisy pryjšoŭsia na 2022 hod. Tamu ciapier takoha aktyŭnaha pašyreńnia nie adbyvajecca. Zapyty na ofisnyja płoščy jak praviła, nievialikija — 100-600 kv.mietraŭ.
Asablivych patrabavańniaŭ da ofisnych pamiaškańniaŭ z boku IT-kampanij ź biełaruskimi karaniami niama. Heta, jak praviła, centralnaje miescaznachodžańnie, jakasnaja architektura i dyzajn, najaŭnaść parkovačnych miescaŭ (zvyčajna chočuć bolš, čym moža dać arandadaŭca), źmiašanaja płaniroŭka (kabiniety i open space), pieravažna z azdableńniem.
Pry hetym šerah deviełapieraŭ hatovyja dać dadatkovyja pasłuhi arandataram: pierahavornyja pakoi, ahulnyja kuchni, zony adpačynku, terasy i prylehłyja terytoryi. Košt hetych pasłuh časam užo ŭklučanaja ŭ arendu.
Za minuły hod staŭki niaznačna vyraśli. Ofisy kłasu «A» prapanujuć u arendu pa 15-20 jeŭra za kv.mietr biez PDV i ekspłuatacyi, kłasu «B» — pa 10-14,5 jeŭra za kv. mietr.
U Colliers prahnazujuć, što ŭ hetym hodzie staŭki naŭrad ci źniziacca, asabliva na jakasnyja ofisy ŭ centry horada, jakich nie chapaje. Pra heta śviedčyć i vakantnaść. U pryvatnaści, u ofisach kłasu «A» jana davoli nizkaja — kala 7% svabodnych płoščaŭ.
Kamientary