Nie tolki śmierć čynoŭnikam za zdradu, ale i novyja palitartykuły. Jurysty razabrali źmieny ŭ kryminalnym zakanadaŭstvie

Istotna pavyšajuć štrafy za šerah złačynstvaŭ

Pa ahulnym pravile štraf moža pryznačacca ŭ pamiery ad 30 da 1 000 bazavych vieličyń (za ekanamičnyja złačynstvy — ad 300 da 5 000 bazavych vieličyń).

U adpaviednaści sa źmienami, za hienacyd, ekacyd, usie złačynstvy, źviazanyja z teraryzmam, stvareńnie złačynnaj arhanizacyi abo ŭdzieł u joj, bandytyzm, stvareńnie niezakonnaha ŭzbrojenaha farmiravańnia, masavyja biesparadki, usie złačynstvy z raździeła «Złačynstvy suprać dziaržavy i paradku ažyćciaŭleńnia ŭłady i kiravańnia» (u tym liku zdrada dziaržavie, špijanaž, dyviersija i ŭsio, źviazanaje z ekstremizmam) moža dadatkova pryznačacca štraf u pamiery ad 500 da 50 000 bazavych vieličyń.

«Atrymlivajecca, što maksimalny štraf budzie składać 1,85 miljona rubloŭ.

Vidavočna, što na hety momant čaściej za ŭsio z hetaha pieraliku buduć sustrakacca złačynstvy, źviazanyja z ekstremizmam. Taksama vidavočna, što apłata takoha vialikaha štrafu dla bolšaści hramadzian Biełarusi niemahčymaja. 

Adpaviedna, dla apłaty budzie vykarystoŭvacca majomaść abvinavačanych, pry hetym nijakaha supastaŭleńnia pamieru štrafu z pamieram naniesienaj škody nie budzie patrabavacca. 

Taksama nieapłačany štraf budzie poŭnaściu zakryvać mahčymaść daterminovaha vyzvaleńnia asudžanych.

U cełym hetyja źmieny dobra ŭpisvajucca ŭ ahulnuju karcinu represij, jakija praciahvajucca ŭ Biełarusi», — adznačajuć jurysty. 

Značnyja źmieny ŭniesieny ŭ artykuł ab zdradzie dziaržavie

Dadadziena, što, akramia pieradačy dziaržaŭnych sakretaŭ Respubliki Biełaruś i inšych krain, da zdrady dziaržavie budzie adniesiena pieradača dziaržaŭnych sakretaŭ mižnarodnych arhanizacyj i miždziaržaŭnych utvareńniaŭ.

«Vidavočna, što pad hetymi arhanizacyjami i ŭtvareńniami razumiejecca siońnia ADKB i Sajuznaja dziaržava, adnak zastajecca adkrytym pytańnie, nakolki ŭ pryncypie «dziaržaŭnyja sakrety» mohuć być nie dziaržaŭ, a nadździaržaŭnych utvareńniaŭ. Takim ža čynam źmieniena i dyspazicyja artykuła «Špijanaž».

Taksama paśla pryniaćcia źmien absalutna luby čynoŭnik, jaki zajmaje dziaržaŭnuju pasadu jak u cyvilnym, tak i ŭ vajenizavanym orhanie budzie nieści pavyšanuju adkaznaść za «zdradu dziaržavie». 

Toje ž tyčycca i vajennasłužačych.

Ciapier pa hetym artykule pahražaje ŭ tym liku pažyćciovaje pazbaŭleńnie voli i śmiarotnaje pakarańnie (raniej maksimalnaje pakarańnie było roŭnaje 20 hadam pazbaŭleńnia voli).

Akramia prostaha ŭzmacnieńnia adkaznaści za razhałošvańnie dziaržaŭnych abo słužbovych sakretaŭ, u KK taksama ŭviedzieny asobny sastaŭ złačynstva — artykuł 375-2 «Parušeńnie patrabavańniaŭ pa abaronie dziaržaŭnych sakretaŭ».

Pad im majecca na ŭvazie naŭmysnaje niezakonnaje pieramiaščeńnie nośbita dziaržaŭnych sakretaŭ.

Uviadzieńnie adkaznaści za prapahandu teraryzmu

Kryminalny kodeks dapoŭnieny artykułam 289-1 «Prapahanda teraryzmu». 

Pad prapahandaj teraryzmu majecca na ŭvazie «raspaŭsiudžvańnie ŭ luboj formie materyjałaŭ i (abo) infarmacyi ŭ metach farmiravańnia ŭ indyvidualna-niavyznačanaha koła asob prychilnaści da terarystyčnaj ideałohii abo pryznańnia terarystyčnaj dziejnaści dapuščalnaj».

Za prapahandu teraryzmu abo jaho publičnaje apraŭdańnie, u tym liku ŭ ŚMI ci internecie, budzie pahražać pakarańnie da 3 hadoŭ pazbaŭleńnia voli sa štrafam ci biez. 

A kali čałaviek byŭ raniej asudžany za złačynstva, źviazanaje z teraryzmam, to za prapahandu jamu mohuć dać da 7 hadoŭ kałonii sa štrafam abo biez.

«Z ulikam sumnaha dośviedu pa spravie Zielcera možna mierkavać, što luby kamplemientarny kamientar pra terarystyčnuju dziejnaść, jakaja traktujecca dziaržavaj vielmi šyroka, moža być razhledžany jak učynieńnie hetaha novaha złačynstva», — adznačajuć jurysty servisu LegalHub.

Dapoŭnieny artykuł pra dyskredytacyju Biełarusi

U tekst artykuła 369-1 «Dyskredytacyja Respubliki Biełaruś» dadadziena, što raspaŭsiudžvańnie zahadzia łžyvych źviestak ab dziejnaści Uzbrojenych Sił Biełarusi, inšych vojskaŭ i voinskich farmiravańniaŭ, vajenizavanych arhanizacyj taksama ŭvachodzić u hety skład złačynstva.

Adkaznaść za raspaŭsiud zahadzia łžyvych źviestak ab vajennym stanoviščy pa hetym artykule isnavała i raniej.

«Da kanca niezrazumieła, ci źjaŭlajecca hetaja źmiena vynikam upłyvu Rasii. Ale ŭ Biełarusi za padobnyja dziejańni adkaznaść była praduhledžana ŭžo dastatkova daŭno, a značyć, hetaja źmiena mała paŭpłyvaje na isnujučuju praktyku», — adznačajuć jurysty. 

U adroźnieńnie ad źmien, jakija ŭnieśli ŭ rasijski KK hod tamu i jakija źmiaščajuć vielmi padrabiaznaje apisańnie sastavu złačynstva, u Biełarusi źmieny vyhladajuć našmat bolš łakanična.

Kolki zaraz zmohuć trymać pad vartaj da vystaŭleńnia abvinavačańnia

Hetym zakonam ustanaŭlivajecca, što pa spravach ab zdradzie dziaržavie i špijanažy zatrymańnie da vystaŭleńnia abvinavačańnia moža doŭžycca nie standartnyja troje sutak, a dziesiać. Tak było raniej z šeraham inšych artykułaŭ KK.

Źmieny pa złačynstvach, źviazanych z teraryzmam

Za častku złačynstvaŭ, źviazanych z teraryzmam (u tym liku akt teraryzmu i akt mižnarodnaha teraryzmu), pahražaje pavyšanaja adkaznaść u vypadku, kali raniej hetaj ža asobaj ździejśnieny lubyja inšyja dziejańni, źviazanyja z teraryzmam ci ekstremizmam. 

Raniej suviazi terarystyčnych i ekstremisckich dziejańniaŭ nie było.

Čytajcie taksama: 

Ukaz pra «kamisiju pa viartańni» skłali tak, kab jon ničoha nie harantavaŭ. Voś što heta dakazvaje

Jak vypisacca z kvatery, kali nie možaš pryjechać u krainu, i ci treba dla hetaha pieradavać pašpart?

Vy za miažoj, a vas šukajuć z vajenkamata. Što rabić?

• 3
• 0
• 1
• 2
• 1
• 2
• 26
• 0